Йошкар-Олаште 2-шо номеран йоча поликлиникым тений июньышто ыштен шуктышаш улыт.
Паша кузе кайымым тергаш Марий Элым Вуйлатыше Ю.Зайцев миен коштын. Тусо кумдыкым, йоча площадкым, зданий ончылым, парковкым ончалын, тыгак регистратурын, рентген отделенийын, педиатрий отделенийын, врач-влакын кабинетыштын, конференц-залын, процедур кабинетын, лабораторийын да технический пӧлем-влакын мынярлан ямде улмыштым аклен.
Объектым ончымыж годым Юрий Зайцев нелылыкым лукшо участкым палемден. «Мыланем соцкыл гоч рӱдолаште илыше-влак ты объектын подвалышкыже вӱд пурымо нерген возеныт ыле. Республикысе Чоҥымо паша, архитектур да ЖКХ министерствылан ты йодышым шергалаш да нелылыкым кораҥдаш кӱштем. Шкеат тидым терген шогем», – каласен Юрий Зайцев да, лекше йодышым кораҥден, 1 июнь марте пашам мучашлаш шӱден.
У медицине тӧнежым «Продолжительная и активная жизнь» нацпроект почеш чоҥымо. Тидлан 2024-2026 ийлаште 657 млн утла теҥге ойыралтын. Росстройконтрольын данныйже почеш, объект 92 процентлан ямде.
Поликлиникын зданийже 2 да 4 пачашан. Тыштак 15 верлан кечывал стационар, физиотерапевтичесий, эндоскопический отделений-влак, функциональный диагностике кабинет, процедурный, участковый педиатр-влакын, хирургын, моло аҥысыр специалист-шамычын кабинетышт верланат.
Проект почеш 40 машиналан вер, йоча площадке, каныме зоно, начар тазалыкан еҥ-влаклан инфраструктур лийыт, кумдыкышто ужар кушкылым шындат. Лачак кызыт сылнештарыме паша шукталтеш. Зданий кӧргысӧ пашамат ыштыме, лишыл жапыште тудым да инженерный системе-влакым вераҥдымым мучашлышаш улыт.
У йоча поликлиникыште Йошкар-Оласе куд кугу микрорайонышто илыше 15 тӱжем утла йочалан услугым пуаш тӱҥалыт. Ик сменыште поликлинике 500 еҥым ончен кертшаш.