2025 ийыште У ий вашеш ача-аван попеченийже деч посна кодшо да йочапӧртын 99 воспитанникше пачер деч сравочым налыныт. Нунын коклаште Александр Крючковат лийын. Рвезым Кужэҥер район гыч Токсыбаевмыт марий еш ончен куштен.
Пашаче еш
Токсыбаевмыт Топкавлак селаште илат. Шке озанлыкышт уло. Ушкалым, ӱшкыжым, презым, сӧснам, чывым, пий ден пырысым ашнат. Эше имньым налаш шонат. Пашаче вате-марий Юмылан ӱшаныше улыт, сандене йырым-йырышт порылыкым шараш тыршат, икшывышт-шамычымат тидлан туныктат. Мария Геннадьевна эшежым киндым шке пышта. Кеҥежым чодыраште тӱрлӧ емыж-саскам, поҥгым погымеке, тамле кочкышым ямдыла. Вячеслав Валентинович Шернур район гыч. «Сернурский» сырзаводышто механиклан тырша. Кид-йолжо чылалан толеш.
Йоча куаным конда
Мария Геннадьевна ден Вячеслав Валентиновичым пӱрымаш варарак вашлийыктен. Кажныжын тылеч ончыч шкеныштын ешышт лийын.
– Вячеслав Валентиновичын икымше пелашыж деч кок икшыве шочын. Кызыт тудым кум уныкаже куандара. Мыйынат кок йочам да ик уныкам улыт. Икшыве ешым пеҥгыдыракым ышташ полша. Шкенан шочшым Юмо пуэн огыл, сандене йочапӧрт гыч эн ончыч изирак ийготан ӱдырым налаш шоненна. 2015 ийыште районысо опеке пӧлкаш миенам. Тунеммашым эртенам, кӱлеш документым ямдыленам. Но изи ньога-влакым ешыш вашке налыт.
Кок ий гыч веле августышто опеке пӧлка мыланна йыҥгыртен да 12 ияш рвезе улмо нерген ойлен. Туддеч приёмный еш отказатлалтын улмаш. Мый Сашам мӧҥгӧ кондаш вигак келшенам. Рвезын ны фотожым, ны видеом ужын омыл. Шӱм-чонемым колыштынам да кок кече гыч Морко рвезым ешышкына пуртенна.
А сентябрьыште Саша Гриша эргым дене ик классыш тунемаш каен. Вашла вигак ик ойыш шуыныт, келшен иленыт. Саша школ деч вара Кужэҥер посёлкысо Аграрный колледжыш тунемаш пурен, кызыт тудо МарГУ-н студентше, агроинженерий специалист лияш ямдылалтеш. Шукерте огыл шке пачерышкыже илаш пурен. Уналыкеш молгунамсе семынак чӱчкыдын толаш тырша, – палдарыш Мария Геннадьевна.
Йомакысе гай кум ака-шӱжар
2022 ийыште Токсыбаевмытын ешышт иканаште кум ӱдыр дене темын. Мария Токсыбаева каласкала:
– Шернур район Казанский селасе школ-интернатыште пашам ыштыше ик палымем йыҥгыртен да нунын дене Ульяна ден София йыгыр ӱдыр-влак улмо нерген каласен. Школ деч вара кушко кайымышт нерген чот тургыжланен. Мый адакат Кужэҥер районысо опеке пӧлкаш миенам. Тушто Ирина Витальевна Измайлова тырша. Пеш поро да сай айдеме. Тудак кеҥеж каникул годым ӱдыр-шамычын кушто улмышт нерген мыланем каласен да кӱлеш документым пуэн. Ты документ дене Йошкар-Олаш каенам. Марий Элысе Образований да науко министерстве Савинысе школ-интернатыш ӱдыр-влак дене вашлияш разрешенийым пуэн. Лач тушто кугурак Юля акашт улмо нерген пален налынам.
Ешыштына кум ӱдырге мӧҥгӧ кондаш келшенна. А кузе нуным ойырет?! 15 ияш Юля кызыт Топкавлак тӱҥ школышто 8-ше классыште тунемеш, а 14 ияш София ден Ульяна – Руш Шой школ-интернатыште. Кажне каныш кечылан мӧҥгӧ кондена. Сурт сомылкам ышташ пеш полшат. Йошкар-Оласе улыт гынат, ялысе илышлан тунем шуыныт. Кызыт ушкалымат лӱштат, пакчаштат полшат, кочкаш ямдылат, пӧртым эрыктат. Лач пеледышыш вӱдым опташ эре мондат. Еш дене пырля алмаз мозаикым ышташ, пидаш, мелнам да когыльым кӱэшташ йӧратена. Ӱдыр-влак сылне йӱкан улыт. Мурат, куштат. Машинамат виктараш тунемыныт. Мотоблок дене шудым шупшыкташ нунылан пеш келша.
Чылан пырля пӱртӱс лоҥгаште канаш, колым кучаш кошташ кумылан улына. Выньыкым пырляк пидына, шуко поҥгым, емыжым погена да телылан ямдылена. Ешыште паша деч иктат ок лӱд. Кеҥежым ял уремыште шӱкшакымат эрыктена, тӱрлӧ пеледышым шындена.
Ешышкына кондымо ныл йочанат ачашт колен, а авашт ача-ава права деч посна кодын. Ӱдыр-шамыч деке Лида ковашт, Ксюша кугурак акашт да тудын Аврора ӱдыржӧ чӱчкыдын вашлияш толыт. Ӱдыр-влакым, паспортым налмеке, пачерлан черетыш шогалтыме.
Токсыбаевмыт ешым ончен, куанаш да кугешнаш веле логалеш. Вет чыла огыл еҥ йот икшывылан ача-ава лийын кертеш. А Мария Геннадьевна ден Вячеслав Валентинович ончаш налме кажне икшывым шкеныштын гаяк йӧратат. Нуным илышлан ямдылат, шукылан туныктат, сеҥымашыштлан йывыртат.
Еш альбом гыч налме фото-влак.