Тений апрельыште Марий Элыште Йырым-йырысе кумдыкым самырык шымлыше-влакын Б.В.Всесвятский лӱмеш всероссийский конкурсыштын финальный этапше эртаралтын. Тушто «Ботаника и экология растений» номинацийыште Морко район Коркатово лицейын тунемшыже Алина Павлова кокымшо верым налын.
Сеҥымаш кумылаҥда
Алина 11-ше биологий-химий классым тунем пытара. Кызыт кугыжаныш экзамен-влакым сдатла.
– Йочам годым юрист але химик лияш шоненам. Да медицине аланым ойырен налынам, садлан 7-ше класс деч вара биологий да химий профилян классыште тунемаш тӱҥалынам. Эн чот химийым йӧратем, – манеш ӱдыр.
Алина эр гыч кас марте – лицейыште. Урок-влак деч вара ешартыш занятий-влак эртаралтыт, кызыт гын экзамен-влаклан кыртмен ямдылалтыт: химий ден руш йылмым сдатлен, ончылно – биологий дене. Тылеч посна тудо школ илышышкат чолган ушнен: спорт таҥасымашлаште шкенжым терген, тӱвыра мероприятийлаштат чолгалыкшым ончыктен. Шанче конкурслаште шинчымашыжым ончыктен.
– Борис Всесвятский лӱмеш конкурсыш икымше гана ушненам. Биологийым туныктышына Валентина Михайловна Васильева кодшо кеҥежлан шанче-шымлыме пашам пуэн ыле. Тудак ты конкурсыш йодмашым колташ темлен. Темыже – «Морко районысо кушкыл-влак». Научный консультантем дене пырля районысо тыгай кушкыл-влакым шымленна. Йомаш тӱҥалше кушкыл-влак кушмо у верлам муынна. Шуктымо сомылнам шымлыме пашаштем радамленам. Тусо данный-влак Марий Элысе Йошкар книган у изданийжым ямдылымаште полшен кертыт, шонем. Конкурсышто кокымшо верым налмемлан куаненам, тиде сеҥымаш ончыкыжымат тыршаш кумылаҥда. А кушкыл-влакым шымлаш моткоч келша, садлан лицейыштына 9-ше класс гыч экологий дене олимпиадылаштат участвоватленам, – каласкала А.Павлова.
Мура, кушта, сӱретла…
Алина шкенжым тӱрлӧ аланыште терга. Волейболла модеш, лицейысе команде дене таҥасымашлашке ушнат да ончыл верышкат лектыт. Музыкальный школым йошкар диплом дене тунем пытарен. Яра жапше годым гитарым шокташ йӧрата. Тудо тыгак Кугу Шале тӱвыра портысӧ «Айвика» мурымо да куштымо ансамбльыште кушта. Алина эше моторын сӱретла, художественный конкурслашкат пашаже-влакым колта да сеҥыше-шамыч радамыш лектеш. Сӱретлаш мастарлыкше ача-аваж деч куснен. Ачаже Владимир Альбертович – Марий Эл Республикын сулло художникше, ончыч лицейыште туныктен, кызыт Кокласола ял шотан администрацийым вуйлата. Аваже Рушания Рафиковна лицейыште изобразительное искусство ден черченийым туныкта, Морко йоча сымыктыш школышто классым вӱда.
А кызыт Алина Павлован ик кугу шонымашыже гына – экзамен-влакым сайын сдатлаш да Озаҥ оласе мединститутыш тунемаш пураш. Тек шонымет семын лиеш, чолга марий ӱдыр!