Фотошто шолаште – Юлия, пурлаште – Оля. У Торъял посёлкышто шочын-кушшо 13 ияш йыгыр ӱдыр-влак мастарын мурат, чолгалыкыштым тӱрлӧ конкурсышто ончыктат.
Якимовмыт ешыште йыгыр-влак кугурак икшыве улыт, эн кугужлан Юлиям шотлыман – Оля деч ондакрак ош тӱням ужын. Икымше классым тунем пытарыше Даша шӱжарыштат мураш мастар. Ешышт шукерте огыл эшеат кугемын – изи Лёшалан ныл тылзе гына.
Ӱдыр-шамыч шымше классыш вонченыт. Урок деч вара посёлкысо тӱвыра пӧртыш музык занятийыш уло кумылын вашкат.
– Вич ияш мураш тӱҥалынна. Йочасадыш коштмына годымак моштымашнам шекланеныт да У Торъял тӱвыра пӧртыш мураш кошташ темленыт. Кызыт туныктышына – Лиана Владимировна Смирнова, – маныт ӱдыр-влак.
Школ илышыштат Юля ден Оля чолгалыкым ончыктат. Тыршен тунемыт, мероприятийлаш кумылын ушнат. СВО-лан полшымо, поро кумылым ончыктымо моло акцийла деч ӧрдыжеш огыт код. Кызыт кеҥеж каникул гынат, ӱдыр-влак мӧҥгыштӧ огыт шинче, ик мероприятийыш миен толыт веле, весылан ямдылалташ тӱҥалытат. Теве кызыт нуно Финн-угор самырык-влакын слётышкышт каяш ямдылалтыт.
Юлялан музык урок утларак келша гын, Олян йӧратыме урокшо – физкультур. Оля ончыкыжым юрист лийнеже, акаже тидын шотышто эше шонен омыл, манеш.
Оля ден Юлия шукыж годым коктын сценыш лектыт, тыгак «Семэҥер» ансамбльыште, «Кечыйол» триошто мурат.
– Марла эстрадный муро-шамычым мурена: утларакшым – Шочмо элым йӧратыме, аралыме нерген. Муро-влакым Лиана Владимировна темла, южгунам шкеат ойырен налына. Школышто, йолташ-влак коклаште шукыж годым рушла мутланена. Но мӧҥгыштӧ ача-авана лач марла кутырат, садлан мурым тунеммаште нелылык ок лек, пеш вашке шарнен кодына, – ойлат Якимовмыт.
Сценыш лекме деч ончыч изиш тургыжланем манын палемда Оля, а Юлиям гын тыгай шижмаш ок авалте, манеш. Шуэн, но тыгаят лиеда: южгунам сценыш коктын огыл, а шкетын лектын мурыман. Эре пырля мурен тунемше Юлия ден Олялан тыгай годым каньыле огыл, вет коктын – коктынак, эҥертыш шижалтеш.
Чурий дене ик сынан улыт гынат, ӱдыр-влакын койышышт ойыртемалтеш. Юлия поро, весым чаманыше да полшаш эре ямде. А Оля умылен моштышо, моло-влак дене кылым вашке муын моштышо, илышлан куаныше да лӱдде ончыко кайыше улам манын палемдыш. Ик классыште тунеммаште лач сайжым гына палемден кертына, маныт ӱдыр-влак. Нуно икте-весылан эре полшат. Вес семынже лийын огешат керт, вет нуно акак-шӱжарак веле огыл, эше эн лишыл йолташ улыт.
Авторын фотожо.