Йошкар-Олаште марий ешыште шочын-кушшо Оксана Полукарова ынде ятыр ий Уссурийск олаште ешыж дене ила. Приморский крайыш куснымыжо, тусо илыш нерген Оксана деч пален нална.
Име кушко – шӱртӧ тушко
– Школ деч вара МОСИ-н экономический факультетшым тунем пытарышым.
2007 ий кеҥежым марлан лектым, да 2008 ий декабрь мучаште пелашем дене Марий Эл гыч Мӱндыр Эрвелыш кайышна. Денис – пограничник, Россий-Китай чекым оролымаште службым эртен, – палдарыш Оксана.
Денисын служитлыме заставыште еш дене илаш условий лийын огылат, Оксана воктенысе Черниговка посёлкышто илен, туштак лётчик-влакын военный гарнизонышт верланен. Посёлкысо ик банкыште пашам ыштен, Денис каныш кечылан гына толын.
– 2009 ийыште Егор эргына шочо. Йоча кушкын, шуаралташыже условий кӱлын. Тыге 2015 ийыште ме Уссурийск олаш илаш кусненна. Тунам тиде олам йӧршеш пален омыл, интернетысе увертарымаш гоч пачерым айлен илаш тӱҥална. Егорым йочасадыш колтышна, хоккейыш пуышна, – каласкала самырык ава.
А 2016 ийыште Полукаровмыт ешыште Родион эргышт шочын. Кокымшо ньогамат йочасадыш колтымеке, Оксана Уссурийскысе ик банкыште пашам ышташ тӱҥалын. Денис тыгак чекыште служитлен, каныш кечылам ешыж дене эртарен.
Мотор пӱртӱс, теҥыз…
Уссурийск 1886 ийыште Никольское села семын шочын. Варарак тудо Никольск-Уссурийский олаш савырнен. 1957 ийыште Уссурийск (Уссури эҥер лӱмеш) маналташ тӱҥалын.
Кугыт шот дене Уссурийск Приморский крайыште кокымшо олалан (Владивосток деч вара) шотлалтеш. Раздольная, Комаровка да Раковка эҥер-влак ушнымаште верланен. Олаште 170 660 наре еҥ ила.
Кеҥежым тушто леве да вӱдыжгырак, а теле йӱштырак, лум шагал. Уссурийск – шуко кушкылан да исторический памятник-влаклан поян ола. Ик эн тошто да мотор верлан Дора паркым шотлат. Рӱдӧ паркыште йоча-шамычат, кугыеҥ-влакат канаш йӧратат. В.Л.Комаров лӱмеш Уссурийскысе кугыжаныш пӱртӱс заповедникыште Мӱндыр Эрвелын ойыртемалтше пӱртӱсшӧ нерген шуко пален налаш лиеш. Тигр-влакым арален кодымаште да шукемдымаште тушто кугу пашам шуктат. Палемдыман, уссурийский тигр ты олан гербыштыже ик эн тӱҥ символлан шотлалтеш.
Уссурийскыште лу ий наре илен, Полукаровмыт тусо илышлан тунем шуыныт. Оксана верысе банкыште пӧлкам вуйлата, Денис сулен налме канышыш лектын, ынде шкаланже шке пашам ышта – чоҥымо пашаште тырша. Эрге-влак школышто тунемыт, уло яра жапыштым хоккейлан пӧлеклат.
– Уссурийск пеш кугужак огыл, Йошкар-Ола дечат изирак. Кугу производство олаште уке. Марий Элыш мийымем годым акым эре таҥастарем. Уссурийскыште кочкыш сату шергырак: шӧр ик литрже 140 теҥгеаш, муно (10 шт) – 160 теҥге, ушкал шыллан 600-700 теҥгем тӱлыман.
Тыште пӱртӱс моткоч мотор. Олаште илыше-влак кокла гыч шукынжо 80 наре меҥге тораште верланыше Владивостокыш пашаш кудалыштыт. Пелашемат тушто паша дене чӱчкыдын лиеда. Еш дене каналташ Владивостокыш эре кудалыштына. Японский теҥыз воктене лияш йӧратена. Тушто кол, вӱдыштӧ илыше моло янлык пеш шуко. Телым колым кучаш келша, ече дене мунчалтена. Эрге-влак кажне кеҥежым теҥыз воктене каныме базыште лийыт, – ойла Оксана.
Уссурийскыште илыше-влак каныш кечылан Китайыш кудалышташ йӧратат – автобус дене кум шагат наре жапыште миен шуаш лиеш. Тушто тӱрлӧ мотор верым ончен коштыт, канат, китай кочкышым кочкыт. Полукаровмытат ятыр гана пошкудо элыште лийыныт. Егор ден Родионлан тусо кухньо пеш келша. Уссурийскысе ятыр кафештат китай кочкышым темлат манын палдарыш самырык ӱдырамаш.
Хоккейлан кӧра
Полукаровмытын кок эргыштат хоккей дене профессионально заниматлат. Приморский крайын чапшым тӱрлӧ таҥасымаште аралат. Китайыш, Йӱдвел Корейыш модаш чӱчкыдын кудалыштыт, Российын тӱрлӧ регионыштыжо лийыт.
– Спортлан шуко жапым ойырат гынат, коктынат сайын тунемыт. Школ деч вара иканаште ий полатыш вашкат – тушто илатат, манаш лиеш. Спорт дисциплиным кучаш сайын полша, эрге-влакым ончен куштымаште тиде поснак кӱлешан. Йолташыштат шуко. Икшывына-влакын хоккейыш коштмыштлан кӧра меат, нунын ача-авашт, ик еш гай келшен, икте-весылан полшен илена, ваш-ваш уналыкеш коштына.
Йошкар-Олаштак кодына гын, илышна могай лиеш ыле манын южгунам шонкалена. Эргына-влак тӱрлӧ вере огыт кудалышт ыле. Идалык жапыште хоккей командышт дене кушко гына огыт чоҥештыл! Садлан чемоданышт эре ямдак, – манеш ава.
Корнылан жап да шийвундо шукак каят гынат, Полукаровмыт кажне ийын Марий Элыш толаш тыршат. Тыште ешышт, родо-тукымышт дене жапым эртарат, шочмо кундемыште чоным кандарат.
Еш альбом гыч налме фото-влак.