6 июньышто Морко район Унчо селаште Пеледыш пайрем пеш веселан эртыш.
Унчо кундем марий шӱлышыж дене шукылан палыме. Ты пайремат кугу кӱкшытыштӧ эртаралтын. Тушко тысе калык веле огыл, пошкудо ялла да моло район гычат толыныт.
Ял калыкым Пеледыш пайрем дене Унчо школын директоржо А.С.Григорьев, ты кундемысе «Передовик» СХА-н председательже Ю.А.Игнатьев, районысо ялозанлык пӧлкам вуйлатыше А.Ю.Гурьянов да Унчо ял шотан илемым вуйлатыше И.М.Евсеев саламленыт.
Янык памаш кумдыкышто моткоч шуко еҥ погынен. Кажныже шке палымыжым вашлийын, мутым вашталтен кертын. Жапым оҥайын эртараш могай-гына площадкыла пашам ыштен огытыл. Йоча-влаклан тӱрлӧ модыш лийын, кугыеҥ-шамыч волейбол дене модыныт да кирым нӧлтен таҥасеныт.
Тений пайрем концерт чынжымак шарнымашеш кодеш. Сценыште Шлань тӱвыра пӧртын «Эр кече» да «Кечыйол» ансамбль-шамыч калыкым марла муренкуштен куандареныт. Тыгак пайремым сӧрастараш марий артист-влак Сергей Пакеев, Александр Марков да Станислав Устюгов толыныт. Гармонь йӱк ден такмак-влак лектын тавалташак таратеныт, а ончаш погынышо калыкше курыкла койын.
Пеледыш пайремыш толшо уна-шамыч коклаште лотерей модышым эртареныт. Тушко нылшӱдӧ еҥ ушнен. Нунын коклаште тӱрлӧ пӧлекым модылтеныт.
Кастене Унчо тӱвыра пӧртыштӧ эртыше марий дискотекышке артист-влак деке тыгак Сергей Савинов ушнен. Тыге веселан, марий сем дене пайрем мучашлалтын.