Ожнысо йӱла
Тошто Торъял гыч толшо коллективыш коштшо вате-влак уржа киндым, киндым, оварчыкым, полан да йошкарушмен когыльым, перемечым (а тыште премеч манын ойлат), ош сукырым ыштен конденыт. Тыгак эн кугу киндыштат, диаметрже дене 50 сантиметрыш шуэш, лач нунынак лийын.
Надежда Викторовна Чемекова У Торъял район Тошто Торъял йочасадыште прачкылан пашам ышта. Ядыкплак ялыште ила. Киндым пышташ 18 ияшыж годымак аважым, Татьяна Михайловна Янгабышевам, ончен тунемын.
Эльвира Терентьеван фотожо.
– Ожно кажне озаватын шушо руаш вочкыжо лийын. Тушан эре руашым коденыт. Кеҥежым кошкен гын, йыр удырен, вӱдым ешарат, вара тудо садиктак шуаш тӱҥалын. Уржа киндым пыштат ыле, а уржа ложаш дене киндым пышташ моткочак каньыле огыл: мыняр тудым лугет, тунар тудо шарла.
Ожныжо тыге ышташ тунемыныт: руашым пу кӱмыжыш вераҥденыт, ӱмбакше – солыкым. Коҥгаш шындаш кӱлын гын, коҥгам чаткан ӱштыныт. Киндым пыштыме пу кольмо дене тудым савырен пыштеныт да коҥгашке чыкеныт. Шокшо коҥгаште уржа кинде шарлен каен огыл, пеш мотор лектын. А кызыт тыгай коҥга огыл, уржа киндым ышташ йӧсӧ, сандене электрокоҥга полшымо дене кӱэштына.
Изина годым эрдене кочкаш пешыже ямдылен огытыл, оварчыкым пукшеныт. Коҥгаштына чуякарак лиеш ыле. Тудо оварен: кӱшыл лончыжо вичкыж лийын, ӱлылжӧ – кӱжгырак. Мыланна вичкыжше келшен, шке семын мыжерын шовыржо манынна. Тамле вӱдыш тушкалтен кочкынна, – каласкалыш Надежда Викторовна.