«Защитники Отечества» фондын филиалже Марий Элысе Правительстве дене пырля спецоперацийын ветеранже-влаклан паша верым муаш полша.
Волжск олаште илыше Сергей Трофимоват шке пашам почаш шонен пыштен. Тудо кӱртньӧ гыч таптыме мотор арвер-влакым ямдыла.
«Илыше кодынам – тидыже эн тӱҥ»
С.Трофимов Шочмо элна верч ик ият пеле шоген. Нелын сусыргымеке, мӧҥгыжӧ пӧртылын.
Сергей Йошкар-Олаште шочын-кушкын, 18-ше №-ан школышто тунемын. 23 ияшыж годым армийыш каен, ончыч Волгоградыште, вара Арменийыште служитлен. Марий Элыш пӧртылмеке, Инна дене сӱаным ыштеныт, да еш Волжск олаш илаш куснен.
СВО-ш Сергей 2023 ий августышто контрактым подписатлен каен – армийыште служитлымыж годым налме шинчымашыже да моштымашыже спецоперацийыште кӱлеш лийыт манын умылен. Пӧръеҥ Шочмо элна верч лӱддымын шоген, но ик бой годым нелын сусырген.
– Авдеевка олам окруженийыш налме годым мыланем ала-мо чоҥештен толын. Ончыч мо да кузем умыленат омыл. Снаряд але мине осколко логалын дыр – мӱшкырышкем керылт пурен, – шарналта ветеран.
Сергейлан вигак икымше полышым пуэныт да Горловка олаш операцийыш колтеныт. Варажым Ростов, Моско олалаште эмлалтын. Да 2025 ий апрельыште С.Трофимов мӧҥгыжӧ пӧртылын.
– Сӧй пасу гыч илыше лекмемлан да мӧҥгӧ «За отвагу» медаль дене пӧртылмемлан ешем да родо-тукымем моткоч куаненыт. Илыше кодынам – тидыже эн тӱҥ, а молыжо лиеш, шоненам шкеже. Мӧҥгыштӧ улам, илем, пеленем – лишыл еҥем-влак – мо эше кӱлеш? Ешем – эн кугу эҥертышем, – манеш пӧръеҥ.
Чоҥымо пашаште, мебельым ыштымаште…
Мӧҥгӧ пӧртылмеке, Сергей кок арня гычак пашаш пурен, рвезе-шамыч дене пырля каркас пӧрт-влакым нӧлтеныт. Но вашке умылен: ты паша тудын огыл.
– Тунам числовой программный управлений операторлан тунемаш кайышым. «Защитники Отечества» фондышто социальный координаторемын темлымыж почеш, Калыклан паша верым ситарыме рӱдерыш полышым йодын мийышым. Туштыжо мыланем келшыше тунеммашым муын пуышт, – каласкала ветеран.
Тунемме деч вара Сергей станок оператор семын мебельым ыштыме фирмылаште пашам ыштен. Ик жап гыч янда дене пашам ыштымаште шкенжым терген ончен. Тушто тунеммыже лачак кӱлеш лийын.
– Но пашадар шагалла чучын. СВО участник-шамычлан соцконтрактым ышташ у условий-влакын илышыш шыҥдаралтмыштым вученам. Да, У ий пайрем деч ончыч, кужу каныш годымат кӱлеш документым ямдылен, соцконтрактым оформитленам, – манеш герой.
Ынде шке станок дене
Кызыт ветеран кӱртньӧ гыч мотор арвер-влакым тапта: мангалым, мӧҥгылан да сад-пакчалан пеледыш подставкым, пум опташ арверым, теҥгыл ден ӱстембалым, тыгак шӱгарлаш вераҥдаш теҥгыл ден ӱстембалым, печым.
– Йӱштынек таптыме пашаште шкемым специальный военный операцийыш кайыме деч ончычак тергенам ыле. Но тунам йолташем дене коктын тыршенна – тудын аппаратше, инструментше дене да тудын пӧлемыштыже. Ынде соцконтракт почеш налме окса дене шке станок дене пашам ыштем. Паша верем – айлен налме гараж, – палдара Сергей.
Гаражыш тудо паша вер семынак коштеш. Заказ-влак улыт гын, пашалан пижеш веле. Уке гын, шукыж годым мангал-влакым ямдыла – тыгайым еҥ-влак эре йодыт. Ик мангалым, мутлан 3-4 кечыште ыштен шукта.
Шке арверже-влакым интернет гоч ужала. Соцкылласе лаштыкыштыжат фото-влакым вераҥда – налаш кумылан-шамыч лектыт веле.
Конешне, заказ-влак шукырак лийышт манын шона мастар кидан еҥ. Но тыгодым умыла: кеч-могай пашаште кӱкшытыш шуаш чытыш, тыршымаш да жап кӱлыт. А кызыт пӧръеҥ сай ончыкылыклан негызым пыштен манын ӱшана да шке тӱҥалме пашажым у кӱкшытыш лукташ шуко тырша.
«Защитники Отечества» фондын Марий Элысе филиалжын материалже негызеш ямдылыме.
Фондын архивше гыч налме фото-влак.