Вашлиймаш
Марий Элым Вуйлатыше Юрий Зайцев йоча сымыктыш школ-влакын форумышт эртыме годым ПФО-со делегацийлам вуйлатыше-шамыч дене Правительстве пӧртыштӧ вашлийын мутланен.
Юрий Зайцев тыгай кӱкшытан мероприятийым республикыштына эртараш кугу чап манын палемден.
«Йоча сымыктыш школ системе гоч ятыр икшыве эрта, вара нуно, сымыктыш пашаеҥ лияш манын, училище ден кӱшыл тунемме верлашке каят. 2026 ийым Россий Президент Владимир Путин Российысе калык-влакын икоян улмо идалыкышт семын увертарен, лачак тӱвыра калык-шамычым икте-весышт дене ушен шога. Икоян улмына – тӱшка вожышто, ме икгайлык да элнан шуко национальностян тӱвыраж дене кылдалтынна. Калыкын тӱрлӧ улмыжо ятыр идалык, ий ден курым пеҥгыдемдалтын. Йоча сымыктыш школ-влакын рольыштым аклашат неле, вет тушто икгайлыкын негызшым изи ийготыштак шыҥдарат», – каласен Юрий Зайцев.
Тудо Россий тӱвыра министерствылан «Еш» нацпроектым шыҥдараш полшымыжлан тауштен. Вет тудын почеш нине школ-шамыч олмыкталтыт, тушко кӱлешан оборудований ден семӱзгарым налыт.
Россий тӱвыра министерствын Региональный политике, образований да проектный управленийжын самырык талант-влаклан кугыжаныш полыш дене полшышо да педагог-влакым аттестоватлыше пӧлкам вуйллатыше Дмитрий Шмидт сайын вашлиймылан тауштен да республикыштына туныктымо тӧнежлаште вияҥдыме инфраструктур ден марий коллектив-влакын усталыкыштым палемден.
Конференций-форумыш ПФО-н 14 субъектше гыч толыныт.