Апрельыште Йошкар-Олаште «Герои Отечества» тоштер-патриот рӱдерыште «Ший талешке» шымлымаш конференций лийын. «Марий ӱдырамаш – Кугу сарын тулыштыжо» номинацийыште Параньга район Кугу Пумарий кыдалаш школын тунемшыже Юлия Волкова икымше верым налын.
«Шинелян ӱдыр-влак»
Юлиян шымлыме пашаже лач тыге маналтеш. Тунемше Кугу Ачамланде сарыште кредалше Пумарий кундемысе ӱдырамаш-влак нерген возен. Материалым ӱдыр марий йылмым да литературым туныктышыжо Галина Ивановна Антонова дене пырля школысо тоштерыште кычалыныт. Юлия каласкала:
– Параньга район гыч чылаже 110 ӱдырамаш, тушеч шочмо Пумарий кундемем гыч куд ӱдыр сарын тулыштыжо лийын.
Мутлан, Екатерина Фоминична Завойскина 19 ияшак сарыш каяш повесткым налын. Тудо 1923 ийыште Нолдӱр ялыште шочын. Аваже шкетын кум ӱдырым йол ӱмбаке шогалтен. Сар тӱҥалме годым Екатерина верысе колхозышто пашам ыштен. Телым имне дене чодырам шупшыктен, шошо-шыже тургымышто – урлыкашым, жатке дене шурным тӱредын, косилке дене шудым солен. 1942 ийыште тудлан сарыш каяш кумшо гана повестке толын. Моско воктене верланыше зенитно-артиллерийский частьыш логалын. Зенитный дивизион тушман самолёт-влакым лӱйкален. Шочмо кундемышкыже Сеҥымаш кече деч вара пӧртылын.
Вес талешке – Елизавета Михайловна Жилина. Тудо Пумарий почиҥга гыч. Сар тӱҥалме годым 18 ияш лийын. 1943 ийыште Елизавета салтак шинельым чиен. Тудо Касвел фронтын Серпуховский 418-ше отдельный запасной артиллерийский дивизийыш логалын. Сеҥымаш кечым Польшышто Люблин олаште вашлийын.
А Евдокия Константиновна Ягодарова сарыште связист, телефонист, регулировщик пашам шуктен. Шкеже изи капан, каҥга веле, но кӧргӧ виян лийын. Совет войскалан, транспортлан чын да лӱдыкшыдымылык корным кеч-могай игечыште, артлӱйкалымаш годымат ончыктен шоген. Икмыняр гана нелын сусырген, госпитальлаште эмлалтын.
Кугешнена да шарнена марий ӱдыр-влакын подвигыштым!
Чыла шӧрыныштат чолга
Юлия 10-шо классыште тунемеш. Книгам лудаш йӧрата. Сандене кажне ийын «Живая классика» конкурсыш кумылын ушна. Сылнын мура. Йошкар-Олаште «Изи шӱдыр» усталык конкурсышто ик гана веле огыл мастарлыкшым ончыктен.
– Школыштына усталык шӱлышан йоча-влак улыт. Мемнам мураш Кугу Пумарий селасе тӱвыра пӧртын коллективше туныкта. Школышто ОБЗР предметым туныктышо Роман Валерьевич Шабдаров эреак полшен шога, тудак мероприятийлашке мемнам коштыкта.
Спорт дене кылым кучем. Волейболла модам, куржталаш йӧратем, но таҥасымашке кызыт ушнымым чарненам, – палдарыш чолга ӱдыр.
Юлия тӱҥалтыш класслам туныктышо лияш шона. Ты профессий тудым изиж годымак сымыстарен. Йоча-шамыч дене мутланаш, нунын дене пашам ышташ, кугурак семын наставник лияш куана. Шкенжым вес пашаште огешат уж, туныктышак лияш шочынам манын ойла.
Еш альбом гыч налме фото.