Марий Элым Вуйлатыше Юрий Зайцев республикысе Правительствын заседанийжым эртарен. Тушто тӱрлӧ йодышым каҥашеныт.
СОЦКОНТРАКТ
Ик тыгай йодыш – социальный контракт.
Тений 1 сентябрьлан кундемыштына 1000 соцконтрактым ыштыме. Тушеч 496 контракт пашам кычалме дене кылдалтын, 382 – шке пашам почмо дене, 51 – подсобный озанлык дене, 71 – неле илыш ситуацийым сеҥен лекме дене.
Идалык мучаш марте чылаже 1593 контрактым ышташ палемдыме. Тений гыч илен лекташ ситыше эн изи окса кугыт деч шагал доходан еш-влак веле огыл, тыгак СВО ветеран-шамыч социальный полышым налын кертыт.
АЧАЛЫМЕ ПАША
Заседанийыште шуко пачеран пӧрт-влакым капитально олмыктымо шотышто адресный программым илышыш шыҥдарыме нерген мутланеныт. Вес ийын 100 утла тыгай пӧртым ачалышаш улыт. Тыгай программым 39 ийлан келыштарыме да тудын почеш 4 тӱжем утла пӧртым олмыкташ палемдыме.
Теният кундемыштына ачалыме паша шукталтеш. 180 инженерный сетьым, 93 леведышым, 12 лифтым да лифт шахтым, 9 подвалым да 32 пӧрт фасадым олмыктат. Палемдыме план почеш 60 % пашам шуктымо. Чыла тидым регионысо Чоҥымо паша, архитектур да ЖКХ министерстве эскеренак шога.
Шуко пачеран пӧртыштӧ илыше-влак капитально олмыктымо сомыллан оксам тӱлышаш улыт. Парыман еҥ-шамычым шижтаренак шогат, «Лето без долгов» акцийым эртарыме, операторын сайтыштыже парыман пачер-влакын спискыштым савыктат да подъездлаште увертарымашым пижыктат.
Министерствыште «шокшо линий» йӱдшӧ-кечыже пашам ышта. Тушко йыҥгыртен, собственник-влак шке пӧртысӧ капремонт фондын кугытшо, ачалыме пашам ыштыме жап, мом олмыкташ кӱлмӧ да мыняр парым улмо нерген пален налын кертыт. Еҥ-влакын, управляющий организацийын да верысе кучемын чолгалыкыштлан кӧра тений шуко пачеран 16 пӧртым капитально олмыкташ кӱлмӧ шотышто решенийым лукмо.
БПЛА СИСТЕМЫМ ВИЯҤДЫМАН
2030 ийлан Россий технологический лидер радамыш логалшаш. Россий Президент Владимир Путинын тыге ойлымо шомакшым Марий Элым Вуйлатыше Юрий Зайцев заседанийыште эше ик гана ушештарен. А тидлан сай кадрым ямдылыман.
Марий Элысе образований да науко министр Лариса Ревуцкая тидын шотышто паша кӱлынак кая манын ойлен. Негызше – образованийыште пилотдымо авиационный системым вияҥдыме концепций. Тидлан школыштак туныкташ тӱҥалыт. Кызыт кундемыштына технологический да инженерный профильный класс-влак улыт. Тушто школьник-шамыч дроным конструироватлаш да тудым кучылташ тунемыт. Тылеч посна «Оператор беспилотных авиационных систем» программе кажне ийын 40 тунемшылан школ гыч лекмыж деч ончычак квалификацийым налаш йӧным пуа.
Кадр резерв ешартыш образованийым пуымо системе гочат ышталтеш. Тыгай шинчымашым «Точка роста» рӱдерыште, «Кванториум» технопарклаште пуат.
Ончыкылык техник-шамыч веле огыл беспилотникым пилотироватлен, тудым кучылтын, ачален моштышаш улыт, тыгак IT-специалист, программист, чрезвычайный ситуацийлаште аралыме шотышто специалист да АПК пашаеҥ-влакат тидлан тунемыт.
Марий Элым Вуйлатыше Юрий Зайцевын полшымыж дене 2024 ийыште кундемна «Стимулирование спроса на отечественные беспилотные авиационные системы» федеральный проектын 30 субъект-участник радамышкыже логалын. Тидыже регионыштына тичмаш инженерный инфраструктурым ышташ йӧным пуэн. 17 школышто беспилотник шотышто кружокым почмо, Йошкар-Оласе технологический колледж пелен практический ямдылалтмаш рӱдерым ыштыме.
Юрий Зайцев Марий Элысе Образований да науко министерствылан олаласе да районласе администраций-влакым вуйлатыше-шамыч дене пырля БПЛА направлений дене инженерный команде-влакым чумыраш кӱштен.