Йошкар-Олаште илыше декоративно-прикладной сымыктышын мастарже Марина Ширманован поян усталыкше нерген пашаже-влак каласкалат. Ик дипломный пашажым, пеледышан чай сервизым, гына ужын, мастар манын кугешнаш амал шочеш.
Эртыме корно
Марина Михайловна Свердловск областьысе Сысерть оласе Кугыжаныш профессионально-технический училищыште «Живописец фарфорофаянсовой промышленности» специальность дене тунем лектын. Варажым ты оласе художественный фарфор заводышто вич ий пашам ыштен. А эше вич ий Моско областьысе Гжельский силикатно-керамический техникумышто керамике шотышто шинчымашыжым келгемден.
Марина Михайловна – кызыт уста туныктышо да наставник. Тыгай шонымаш денак кодшо кечылаште тудын да тунемшыже-влакын ончерышт Калыкле да кидпаша тоштерыште почылто. Тудым «КерамоМарина. Диалог в глине» манын лӱмдымӧ.
Сымыктыш тӱняш наҥгая
М.Ширманова Национальный сымыктыш гимназийыште, тунам эше Йошкар-Оласе 1-ше номеран музыкально-художественный школ маналтын, 1993 ийыште педагоглан тыршаш тӱҥалын. Ондак «Декоративная керамика» предметым художниклан тунемше классыште арнялан кум шагатым туныктен, кызыт тудо шагалрак да «Декоративная композиция» маналтеш.
Марина Михайловна тыглай туныктышо огыл, тудо кажныжым оҥай тӱня дене палдара, сымыктышым шочыкташ да моторлыклан куанаш туныкта. Художник-керамистын мастарлыкше погынен да шинчымашыж дене пайлалтде огеш керт. Гимназийыште йоча-влак «5+» студийыште тӱрлӧ пашам ышташ кумылаҥыт. Тидым кок семын умылаш лиеш: пашам «визытан» отметке плюс дене ышташ; вич ияш да кугурак-влакым тыште вучат.
А коронавирус годым йокрокланен шинчыме пагыт уста еҥлан кугун полшен. Тунам тӧнежысе студийыш кошташ йӧн лийын огыл, а ача-ава-влак йодыныт. Тыге туныктышо рӱдоласе Кирпичный уремысе ик пӧртын пӧлемыштыже шун арверым ыштыше студийым почын. «На Кирпичной» манме студийыш кызыт тӱрлӧ ийготан йоча-шамыч коштыт.
Артекыш шумеш!
Ончерышке чумырымо кидпаша дене палдарымыж годым тунемшыже-влакым йӧратымаш да нунын ача-аваштым пагалымаш шижалте. Педагог воспитанникше-шамыч дене пырля ятыр конкурсыш пашам ямдылен, нунын чоншижмашышт дене илен. Эсогыл кодшо ийын кок воспитанникшын усталыкше «Артек» тӱнямбал йоча рӱдерыш намиен.
– 13 ияш Чулпан Гайнутдинова «Лира» йоча сымыктыш школышто тунемеш. «Артекыш» логалаш манын, группым погыман да кум кече почела заданийыштым шуктыман ыле. Тыге Милана Халитова дене пырля пашам ыштышт. Ты ӱдыр эн ончыч студийышке кошто, вара Национальный сымыктыш гимназийыш тунемаш тольо. Милана шун гыч ыштыме арверым ышташ кумылаҥын. Ача-аваже тудлан станокым, коҥгам налын пуэныт. Чолга ӱдыр «Артекыште», Мӱндыр Эрвелыште лийын. Тений 9-ше классым тунем пытара. Тиде корно денак кая манын ӱшан уло.
Кодшо кеҥежым нуно светильникым ыштеныт. Тыгак шыжым кум кечын эрдене заданийым налын, кас марте тыршен, кастене отчётым колтеныт. Икымше пашам, 20 сантиметр кӱкшытан кашпом, ыштымеке, тудо иземын, сандене тушко лышташым, поҥгым ешараш темлышым. Кокымшо кечын фигуркым ышташ кӱштеныт. Чулпан лесовикым ненчен, Милана – ужавам. Варажым тудым сылнештареныт. Кумшо кечын ӱдыр-влак панном келыштареныт. Тыште посна эпизод-влакым иктеш ушымо дене ойыртемалтыныт. Йодмаш почеш кӱлеш фото ден видеом ыштен колтеденыт. Чыла пашаштым жюри 10 балл дене аклен да, нуно ик эн ончыч ты конкурсым эртен, «Артекыш» логалыныт. Тушто керамике дене посна программе лийын огыл, видеорежиссёр да модельер-влак дене пырля тӱрлӧ пашалан тунемыныт. Туге гынат икмыняр мастер-классыште шун гыч кӧршӧкым, кружка-влакым, светильникым ыштен конденыт да тыште чиялтеныт.
Каласыман: Милана ден Чулпанын пашаштым ужаш тиде ончерыш мияш лиеш. Туныктышын палемдымыж почеш, 9 ияш улмыж годым Чулпанын ик конкурсыш «Муха-Цокотуха» композицийым колтеныт. Тунам пашам гына ончыктеныт, сандене жюри тидым йоча ыштен манын ӱшанен огыл. Тылеч вара ыштыме процессым сниматлашак тыршат да Марина Михайловнан тунемшыже-шамыч призовой верлашке лектыт.
Тӱрлӧ сынан
Ончерыште художникын шкенжын да йоча-влакын тӱрлӧ ийыште ыштыме сӧрал пашаштым ужына.
– Теве Матвей Куклин шке лӱмжым весела буква дене ончыктен. Кажне букважлан ик занятийым пӧлекленна, вара росписьым ыштенна. Ты рвезе моткочак тӱткын колыштеш, пашам ышта. Кызыт тудо 1-ше классыш коштеш. Ковид жапыштак Маша акаже ден Ваня изаже дене заниматлаш ешышкышт ӱжыныт. Тунам ныл ияш Матвеят пырля лийын да ик кугу лаштыкым гуашь дене кыртмен сӧрастарен.
Кодшо шыжым тудын «Пире ден Рывыжше» Ленинград областьысе «Сказка нас зовёт» тӱнямбал конкурсышто участвоватленыт. Организатор-влак оҥай композицийын персонажше-влак поснат сайын ончалтыт маныныт, – каласкалыш туныктышо.
Юлия Солдатко пырыс-влакым йӧратымыжлан кӧра нуным моткоч тӱрлым ненчен. Ешын пӱртӱсыш лекмыжым чодырам, ир сӧснам, шурмаҥшым ончыктымо дене пеҥгыдемден. Тудо кызыт Йошкар-Оласе 1-ше номеран художественный школышто кокымшо ий тунемеш.
Даниэль Медведев кок гана усталык конкурсыш ушнен. Озаҥыште эртарыме «От моря до моря» конкурсышто шке ийготан-влак коклаште 1-ше верым налын.
Марина Ширманова шкежат Российысе конкурслашке ушна. Ик сеҥымашыже – Москошто тений эртаралтше «Уникальная Россия» ончер-форумын «Уникальные мастера России» III всероссийский конкурсыштыжо кумшо вер дене палемдалтын.
