Кодшо арнян Москошто «Лига вожатых» всероссийский конкурсын финалже эртаралтын. Марий Эл гыч тушко В.Дубинин лӱмеш йоча-влаклан тазалыкым пеҥгыдемдыме да туныктымо рӱдерын вожатыйже Елизавета Майсина миен. Ӱдыр «Вожатые-стажёры» номинацийыште профессионал мастарлыкшым терген.
Конкурс индешымше гана эртаралтын, тушко Российын эн сай наставникше-влак ушнат. Тений Марий Эл гыч гына 245 йодмаш пурен.
Школ лагерь гыч тӱҥалын
Елизавета – Козьмодемьянск ола гыч, тусо 3-шо номеран школышто 11-ше классыште тунемеш. Вожатыйлан пашам ыштыме опытшо школ лагерь гыч тӱҥалын: тушто кум ий июнь еда ик смене дене пашам ыштен. А ӱмаште шошым вожатый-влаклан курсым эртен да кугыжаныш образецлан келшыше документым налын. Тудо ийынак июль мучаште В.Дубинин лӱмеш йоча рӱдерыште икымше паша сменыже тӱҥалын.
– Шым кечаш икымше сменем каратист-шамыч отряд дене эртен. Нине чолга да чулым йоча-шамыч тренировко деч посна лагерьын илышышкыжат кумылын ушненыт. Тунамак шке пашам эшеат йӧраташ тӱҥалынам. Кок ий жапыште тиде рӱдерыште чылаже ныл смене пашам ыштенам. Вожатый ӱдыр-рвезе-шамычлан пиалан йоча илышым утларак шижаш полша, тидын денак сомылем сымыстара. Пашаштем эн-эн лияш ом тырше, тыгодым шкем эре шуараш, кушкаш йӧным кычалам, – манеш Е.Майсина.
Смене годым вожатыйын паша кечыже ӱдыр-рвезе-шамычым помыжалтарыме гыч тӱҥалеш. Кынелыт, мушкылтыт, кроватьым шотыш кондат да зарядкыш погынат. Варажымат чыла – кечаш радам почеш. Тыге –кастене малаш пыштыме марте.
Кызытсе икшыве-влак могайрак улыт манын йодмемлан вожатый тыге вашештыш:
– Йоча-шамыч эре йочак улыт, нуно лач цифровой саманыште кушкыт. Гаджетым йӧратымыштым чын корно дене виктарен гына колтен моштыман.
«Сеҥалтше омыл»
«Лига вожатых» конкурсышто шкем тергыме опытшо Елизаветан – икымше. Тудлан ӱдыр кӱлынак ямдылалтын: кейс-влакым решатлен, теорийым тунемын, модыш-влакым ушештарен. Заочный ужашын икымше этапыштыже тестирований лийын, кокымшо этап «Идеальный образ вожатого» проект почеш эртаралтын, а кумшо этап – онлайн-собеседований. – Финалыште ныл заданий лийын. «Аномалий» кокымшо ужашыже утларак нелын чучын – тӱрлӧ номинаций гыч участник-влак, ик командыш чумырген, кейс-влакым решатленна, шкетын решатлыме кейс-влакат лийыныт. Сеҥен омыл гынат, шкемым сеҥалтшылан ом шотло. Тыгай конкурсышто финалыш логалмыжак мом шога, вет Россий гыч чылаже 11 тӱжем наре йодмаш пурен! Адакшым Москошто лийме да ты мероприятийыште шкем тергыме кужу жаплан шарналт кодыт, – палдара ӱдыр.
Вожатый семын Елизавета ончыкыжымат шуаралташ, у кӱкшытыш шуаш шона. А кызыт тудо уло жапшым тунеммылан ойыра, лишыл жаплан шындыме ик эн тӱҥ шонымаш – ЕГЭ-м сайын сдатлаш да шонен пыштыме вузыш тунемаш пураш.
