Марий Элыште пожар ваштареш кучедалме техникылан да оборудованийлан 5,7 млн теҥгем ойырат. Тидын регионысо Правительствын черетан заседанийыштыже увертареныт.
Марий Элым Вуйлатыше Юрий Зайцевын палемдымыж почеш, 2025 ийыште чодыра пожар тылеч ончычсо ий деч кок пачаш шагалемын, ӱмаште 26 пожар лийын, 2024 ийыште – 61.
Пӱртӱс поянлык, экологий да йырвелым аралыме шотышто министрын пашажым жаплан шуктышо Эдуард Щекурин 20 апрель гыч увертарыме пожар лийын кертме лӱдыкшӧ тургымым эртарыме нерген ойлен.
Ик гектар наре кумдыкышто вич чодыра пожарым регистрироватлыме гынат, мониторинг да тулым йӧртымӧ системе шкем сайын ончыктеныт. Авиаций ден мландымбалнысе мониторинг, вышкылаште дежуритлымаш да «Лесохранитель» комплексан 14 видеонаблюдений камер тул ылыжмым писын пален налаш полшат.
Пожарым йӧрташ 2,7 тӱжем утла еҥым, 562 единице техникым лукташ да 2,4 тӱжем оборудованийым кучылташ йӧн уло. Чодырасе корным саемдыме, минерализованный полосам да шлагбаумым ыштыме пашам палемдыме. Май мучаш марте эше 5 спецтехникым, 25 пожарный оборудованийым да 3,7 тӱжем метр пожарный рукавым налшаш улыт. Техникылан да оборудованийлан «Экологическое благополучие» нацпроект почеш федеральный бюджет гыч 5,7 млн утла теҥгем ойырымо.
Марий Элым Вуйлатыше Пӱртӱс поянлык, экологий да йырвелым аралыме шотышто министерствылан мониторингым сутка мучко эртараш, вий-куатым да средствам ешараш, йӱлаш тӱҥалме верым ик сутка жапыште йӧрташ кӱштен. Тыгак чодыраште пожар ваштареш шукталтше мероприятийым терген шогаш манын.