Кугыжаныш Думын депутатше-влак оҥай банк картым ышташ кӱлмӧ нерген темлымаш дене Российын тӱвыра министрже Ольга Любимова деке лектыныт.
Тудым, 55 ияш ӱдырамаш да 60 ияш пӧръеҥ деч тӱҥалын, кугурак ийготан еҥ-шамычлан 6-13 ияш уныкаштым ончаш чолган полшымыштлан пуаш темленыт. Картыш 10 тӱжем теҥгем пышташ палемдыме. Туддене коча-кова-влак уныкашт дене тоштерыш, театрыш, ончерыш, циркыш, планетарийыш, зоопаркыш коштын, тыгак ола ден регион мучко кудалыштын кертыт ыле. Эн ончыч тудым икмыняр регионышто шыҥдарынешт. Тӱҥ шонымаш – тукым-влак коклаште кылым пеҥгыдемдымаш.