Токтарсола ялыш пурымеке, корным ачалыме нерген «Токтарсола-Кемсола» манын возыман вывескым ужна.
А тыште корным олмыктымо шотышто Токтарсола школышко паша дене мийыше Александр Михайлович Воронцов деч йодна. Тудо У Торъял округысо администрацийым вуйлатышын икымше алмаштышыжлан ышта:
– Кызыт ончычсо ийла дене таҥастарымаште эн шуко региональный значениян кугорно олмыкталтеш. У Торъял – Овалже – Советск кугорным ыштен шуктымо. Советск марте маналтеш гынат, тудо Марий Эл Республикын чекше марте шуйналтын. Вӱръял – Кӱан Памаш – Комичи региональный кугорнышто асфальтым шарыме. Кызыт подрядчик ты паша шотышто изи ситыдымашлам кораҥда да лишыл жапыште сдатла.
Токтарсола – Кемсола – олмыктымо кумшо региональный кугорно. Чыла вере корным у технологий почеш олмыктат: тошто асфальтым огыт кораҥде, а щебёнкым цемент дене пырля шарат, тиде цемент кошкымеке гына тушко асфальто-бетонный вишкыдым пыштат.
Эше нылымше кугорно ышталтеш: Кузнеч – Кандашплак – Веденкан. Тылеч посна, пиалешна, эше ик участкыште корным ачалаш тӱҥалме. Тиде Тошто Торъял – Купсола – Кугу Нурмо кугорно. Тудын кужытшо 14 утла километрыш шуэш. Подрядчик шке ончыланже 8 меҥгым тений олмыкташ планым шынден. А вес ийлан 6 меҥге кодеш. Ты корно У Торъял посёлкыш пурыде савырнен кудалаш йӧным пуа. Чыла сомыл «Безопасные качественные дороги» нацпроект почеш шукталтеш.
