Таче вӱдыштӧ утарыше-влакын тӱнямбал кечыштым палемдат. Йошкар-Оласе Рӱдӧ пляжыштат ты кечым пайремлыше герой-влак кажне кечын тыршат: йӱштылшӧ-шамыч вӱд йымаке ынышт пуреҥгае манын, эреак эскерат.
Александр Ермичев – утарыше-влак кокла гыч иктыже. Рвезе Йошкар-Олаште шочын-кушкын. Изинекак спорт дене пеҥгыде кылым куча. Садлан вийвал самырык еҥым ужмеке, чынжымак, нимо деч лӱдаш. Александрын ончыкылык профессийжат еҥ-влаклан поро пашам шуктымо дене кылдалтын. Тудо Йошкар-Оласе технологический колледжыште «Техносферная безопасность и природообустройство» факультетыште пожар лӱдыкшыдымылык дисциплине дене нылымше курсышто тунемеш.
– Мыланем еҥ-влаклан сайым ышташ келша. Очыни, ты кумылемак ончыкылык профессийым ойырен налаш таратен. Тунемме деч посна Куяр посёлкысо 31-ше пожарный частьыште тыршем. Кеҥеж жаплан тыгак вӱдыштӧ утарышылан пашам ыштем.
Оласе Рӱдӧ пляжыште утларакшым дисциплиным шуктышо еҥ-влак канат. Шукыж годым капкылыштышт иктаж-могай изи удыралтмаш але коралтмаш дене мемнан деке толыт. Лиеда тыгаят: йӱшӧ-шамыч йӱштылаш пураш шонен толыт. Но ме нуным йӱштылаш огына пурто. Мӧҥгышкышт каяш йодына. Такшым мутым колыштыт. Тыге нунымат, шкенамат тӱрлӧ томаша деч кораҥдена. Матрос-утарышылан пашаш пурымо деч ончыч Марий Элысе аварийно-утарыме службышто вич кечаш курсым эртенна. Тушто мемнам вӱдыш пуреҥгайыше еҥым чын лукташ, пуш дене ияш, утарышын арверже-влак дене пайдаланаш, икымше полышым пуаш туныктеныт, – каласкала Александр.
Самырык матрос-утарышын палемдымыж почеш, ты пашам шуктышо еҥ эн ончыч лӱддымӧ, тӱткӧ, чулым лийшаш. Тудын дене келшыдежат огеш лий, вет кажне еҥ тыгай пашам ыштен огеш керт. Садлан вӱдыштӧ тыршыше матрос-утарыше-влаклан кугу чап!