Чыла гаяк шуко пачеран пӧртым, 848 социально кӱлешан объектым, 523 котельныйым, чыла тепловой, вӱдым пуышо да канализаций сетьым шокшым пуымо тургымлан ямдылыме.
Марий Элым Вуйлатыше Юрий Зайцевлан тидын нерген совещанийыште республикын Чоҥымо паша, архитектур да ЖКХ министрже Александр Горбунов увертарен.
Паша план-график почеш кая, вашке тудым мучашлат. Марий Элыште шуко пачеран 4 тӱжем утла пӧрт уло, тургымлан ямде улмышт шотышто паспортым пуымо. Куд пӧртым гына тергыме огыл, нуным вашке капитально олмыктен шуктышаш улыт. Шокшым илыме пӧртлаш 5 октябрьыште пуат.
Республикна лийын кертше вучыдымо ситуацийланат ямде. Тидлан 171 аварийно-ачалыме бригадым – 560 еҥым да 240 техникым – чумырымо. Министерстве пелен аварийно-технический шапаш уло: 44 тӱрлӧ материал да оборудований, мутлан, пуч, насос, тӱкылтышан арматур, кабель продукций да дизель генератор.
Тылеч посна кум блочно-модульный котельныйым, 200 кВТ куатан кусараш лийме дизель генераторым, котельный ден вӱдым пуымо да колтымо объект-шамычлан оборудованийым налаш палемдыме.
Республикысе илаш йӧным ыштыше чыла объектлаште электроснабженийын резерв источникше уло.