Шернур посёлкышто илыше Лада Рыбакова школышто туныктышылан пашам ышта, районысо Молодёжный парламентын еҥже семын тӱрлӧ мероприятийым эртараш полша, а шукерте огыл марий эстрадыш икымше пеҥгыде ошкылым ыштен.
«Чонем мура»
Лада Изи Памаш ялыште шочын-кушкын. Изинек музыклан шӱман лийын.
– Ешыштем ачамат, авамат мураш йӧратат. Но артист койышем утларакшым ачам Борис Александрович Петухов деч куснен, шонем. Тудо самырыкше годым чӱчкыдын гитаржым кучен, мурым муралта ыле. Галина Александровна авамынат йӱкшӧ моткоч яндар да виян, – ойла уста еҥ.
Л.Рыбакова школ годсек тӱрлӧ музыкальный конкурсышко ушна. Ӱмаште финн-угор калык-влакын эстраде мурыштым йоҥгалтарыше-шамычын «Ший памаш» IX регион-влак кокласе фестиваль-конкурсышто мастарлыкшым ончыктен да дипломант лийын. Тений «А ну-ка, ӱдыр-влак!» республикысе конкурсын районысо этапыштыже кокымшо верым налын.
– Муро мылам – чон-кумыл паша. Тудо чонемлан куаным конда, ласкалыкым пуа. Ончыч верысе музыкант-влакын мурыштым муренам. А шукерте огыл, ВКонтакте музык платформышто «Чонем мура» пашам лектын. Мутшо Геннадий Оярын, семже Вениамин Семёновын, – манеш Л.Рыбакова.
Муро – шочмо мландын моторлыкшо нерген. Кажне еҥлан шочмо ял – чон шепка. Сандене тиде муро иктымат йӱштӧ чонаным ок кодо, очыни.
Туныктышо тукым
Лада шочмо Шӱдымарий школышто 2015 ий годсек туныктышылан пашам ышта. Шинчымашыжым Августысо конференцийлаште, туныктышо-влаклан форумлаште келгемда. Икманаш, самырык туныктышо верыште шинчаш ок йӧрате. Моштымашыжым тапта, туныктымаште тӱрлӧ йӧным кычалеш.
– МарГУ-со физике да математике факультетым математикым, ешартыш специальностян информатикым туныктышылан тунем пытаренам да вигак Шӱдымарий школыш пашаш толынам. Тыштак ончыкылык пелашем вашлийынам. Тудо физкультурым туныкта. Пелашем – туныктышо еш гыч. Тудын ачаже Анатолий Витальевич Рыбаков Шӱдымарий школын директоржылан ыштен. Кийыме мландыже пушкыдо лийже. Аваже Софья Федотовна – тӱҥалтыш класслам туныктышо.
Пелашем дене коктын шуко шочшан ача-ава улына. Кандаш ияш Алеся ӱдырна, куд ияш Елисей да 4 ияш Елизар эргына-влак куандарат, – каласкала пиалан пелаш да ава.
Тылеч посна Л.Рыбакова – кум ий Шернур районысо Молодёжный парламентын еҥже. Районышто Молодёжь кечым, фестиваль-влакым эртараш полша, тӱрлӧ организацийын представительышт дене кылым ышта. Эшежым Лада – спортсменке. Тудо куштылго атлетике дене заниматла. Апрельыште, мутлан, У Торъял посёлкышто «Сельская новь» газетын призше верч куштылго атлетике дене таҥасымаште куржын да кокымшо верым налын. Шернур марий ӱдырамашын вий-куатшылан, пашаче улмыжлан куанена да кугешнена.