Кодшо кечылаште Чрезвычайный ситуацийым шижтарыме да кораҥдыме, пожар лӱдыкшыдымылыкым ыштыме шотышто комиссийын заседанийыштыже вӱдшор йодышым кундемыштына чот эскераш кӱштымӧ. Вет ончылгоч палемдыме почеш 2026 ийысе шошо вӱдшор ончычсо ийла дене таҥастарымаште пеш тале лийшаш.
– Телым тений поснак шуко лум лумын, ондакысе ятыр идалыкын показательжымат эртен, сандене районлаште икмыняр кундем вӱдйымаке каен кертеш. Тидлан жапыштыже пашам тӱҥалме: посна тӱшка еҥ-влакым да средствам ямдылыме, калыклан жаплан вераҥаш пункт-влакым палемдыме да чрезвычайный ситуацийым чактараш планым уэш ончен лекме да тӧрлатыме, – ойлен Марий Элым Вуйлатыше Юрий Зайцев.
«Верхнее-Волжское УГМС» ФГБУ-н Марий Элысе ЦГМС филиалжым вуйлатыше Дмитрий Ванюков гидрометеорологический обстановко нерген каласкален. 2025 ий декабрь гыч 2026 ий февраль марте кундемыштына нормо деч 2,5-3 пачаш шукырак лум лумын, а 5 мартлан тудын кӱжгытшӧ 85-110 см лийын, тидыже нормым 2-3 пачаш эртен.
Марий Эл Республикысе Гражданский обороно ден калыкым аралыме комитетын председательже Владимир Карпов вӱдшор дене кылдалтше чрезвычайный ситуаций лийын кертме нерген ойлен, муниципальный образований администраций-влаклан тӱҥ задаче-шамычым палемден. Поснак кугу тӱткышым маломобильный тӱшкаш пурышо еҥ-влак дене пашам ышташ, дренажный системым эрыкташ, жапыштыже калыклан увертараш да экстренный оперативный службым ямдылаш. Тыгак шуйкалаш лийдыме мероприятий-влак шотышто порученийым пуэн, поснак вӱдым йоктарен колтымо, обстановкылан мониторингым ыштен шогымо, кочкыш сату ден медикаментым шапашлыме шотышто.
Пӱртӱс ресурс, экологий да йырым-йырысе средам аралыме министр Алексей Киселев регионышто гидротехнический сооружений-влакын шошо вӱдшорым лӱдыкшыдымын да аварий деч посна эртарен колташ ямде улмышт нерген каласен. Водохранилищылаште вӱдым эн кугу показательыште кучымо да лӱдыкшӧ лийын кертме шотышто темлымаш-влакым ойлен.
Юрий Зайцев МЧС-ын Тӱҥ управленийжын Марий Эл Республикысе управленийжылан уда игечылан кӧра калыклан лӱдыкшӧ лийын кертме шотышто мутым кучаш кӱштен.
Тыгак кундемыштына населённый пункт-влакым пожар деч аралаш, минерализованный полоса-влакым ышташ да чодыраште моло мероприятийым эртараш палемдыме, вет тидлан республикысе бюджет гыч шагал огыл окса ойыралтеш манме.