Волгатехысе Механике ден машиностроений институтын (ИММ) Инженерный клубшо начар тазалыкан-влаклан кошташ транспортым шонен луктын да ыштен.
Тиде проектым «Таир 4×4» манын лӱмденыт. Пашаштым вузын студентше-влак 14 июньышто «Эвелин-2026» велопарад годым калыклан ончыктеныт.
Проектым «РВБ» организацийын талантан студент ден самырык учёный-влаклан полшышо «Клуб инициативной молодёжи» программыж почеш илышыш шыҥдарыме. Кодшо ийын ты команде шонымаш гыч тичмаш прототипым ыштыме марте пашам шуктен. Конструкций тичмаш электроприводан да зависитлалтдыме подвеске улмыж дене ойыртемалтеш, тидыжак транспорт средствалан тӱрлӧ верыште кудалаш йӧным ышта.
Эн ончыч пашам Механике ден машиностроений институтын студентше-влак тӱҥалыныт. А вара задаче-влак ешаралтмылан моло институт ден факультетат ушнен. Тидыжак Инженерный клубым ышташ негызым пыштен. Кызыт тудо инженерный проект-влакым тӱрлӧ направлений дене шукташ кумылан студент-влакым ушен шога.
Проектын научный вуйлатышыже, ИММ директорын научный паша шотышто алмаштышыже Денис Ласточкин студент-влакын сайын тыршымыштым палемден. «Чыла этапыштат самырык-шамыч инициативым ончыктеныт: шкеак шонен луктыныт, шкеак ыштеныт. Наставник семын нунын энтузиазмыштым кӱлеш корно дене виктараш гына кодын», – палемден тудо.
Лишыл жапыште ты команде шке проектшым Москошто аралышаш. Тидыже разработкым умбакыже вияҥдаш да грантым налаш корным почеш. Ты проектыш кугу надырым пыштыше-влакын лӱмыштым палемдыде огеш лий. Тиде Мурад Шукуров (ИММ), Александр Малеев (ИММ), Евгений Зверев (ФУП) да Владимир Старков (ИММ). Ты шуктымо пашам илышлан келыштарат манын ӱшанен кодына.
Эльвира Терентьева.
Фотом ПГТУ-н сайтше гыч налме.