Февральыште Звенигово районысо «Мечта» тӱвыра да каныме рӱдерыште профессионал мастарлыкым, усталыкым да моторлыкым аклыме «А ну-ка, девушки!» II районный конкурс эртаралтын.
Тушко тӱрлӧ профессийыште тыршыше вич сылне ӱдыр ден ӱдырамаш-влак ушненыт. Нунын коклаште Звенигово районысо рӱдӧ эмлымверын врач-педиатрже Алина Царегородцеват лийын.
Алина Звенигово район Чакмарий кундемысе Петла ялеш шочын-кушкын. Чакмарий школышко тунемаш коштын да тыштак шке пӱрымашыжым вашлийын.
– Ешыштына врачше лийын огыл. Лачак авам Любовь Валентиновна медицине корно дене каен, кызыт ФАП-ыште пашам ышта. А такшым медициныште 30 ий утла тырша. Ачамын кум шӱжаржат медсестралан пашам ыштат. Нуно мыланем эре примерлийыныт. Санденак 11-ше класс деч вара шке илышем медицине дене кылдаш шонен пыштенам. Йоча жап годсек йырем шуко йоча пӧрдын, тидыжак педиатр лияш таратен. Профессийым налаш Киров оласе медицине университетыш каенам. Тушто куд ийым тунемынам. А пытартыш кок ийыштыже эше вашкеполыш станцийыште медсестралан пашам ыштенам.
Школышто кушташ тунемаш коштынам, а студент улмем годым утларакшым спорт дене кылым кученам, куштылго атлетике дене заниматленам, – каласкалыш шкеж нерген А.Царегородцева.
Университетым тунем лекмеке, Алина Озаҥысе медицине университетыш фтизиатрий дене ординатурышко каен. Тушто шинчымашыжым кок ий келгемден. Ты жапыштак бокс дене тренер, спорт мастер Игорь Царегородцев дене пырля сӱаным эртареныт. Каласыман: Алина ден Игорь школ годсекак пырля улыт, 12 ий келшымеке мужыраҥыныт. Кызыт нунын 3 ияш Василиса ӱдырышт ден 2 ияш Платон эргышт кушкыт. Шукерте огыл коктынат йочасадыш кошташ тӱҥалыныт. Тылеч вара Алина пашашке лектын кертын.
– Яра жапем уке гаяк. Туге гынат шке хоббиемлан видеосъёмкым ыштымым, рилсым сниматлымым шотлем, вет мыйын ик соцкылыште шке лаштыкем уло, тудым вӱдем. Сӱретлаш моткочак йӧратем. Поснак фактурный роспись-влакым ышташ кумылан улам. Профессионал омыл, но ты сомыл эре келшен. Шке шинчаончалтышем дене Озаҥ оласе ик кафен пырдыжшым сӧрастаренам. Тылеч вара кафе оза шке аважын пӧртысӧ пырдыжшымат сылнештараш йодын.
Конкурсысо жюри врач-педиатрым «Йӱлам аралыше» номинацийыште сеҥыше семын палемден. Тудо пелашыж дене коктын марий легенде гыч изирак сценкым ончыктеныт. Алина тале кредалше ӱдырын, Ирган, образшым почын пуэн, а Игорь тудын качымарийжым, Отошым, модын.