1 мартыште Йошкар-Олаште «Фейерверк талантов» всероссийский конкурс-фестиваль эртаралтын. Ты мероприятий тений икымше гана Марий кугыжаныш филармонийын сценыштыже гӱжлен.
Тудым Марий Элысе «Дебют» куштышо образцовый ансамбльым вуйлатыше Анна Соколова тений индешымше гана эртарен. Конкурс-фестивальыш Ленинград, Саратов, Иркутск, Киров ола ден областьла, Удмуртий, Татарстан, Чуваший да Марий Эл республикла гыч 1250 участник толын.
Талантан еҥ-влаклан ныл отделенийым ыштыме. Йочасадыш, школыш коштшо-влакым, студент ден чолга илалше тукымым куштен моштымо мастарлык ик сценыш ушен. Нуно кандаш шагатат пеле гыч 21 шагат марте выступатленыт. Ойыртемже – начар тазалыкан еҥ-влакын инклюзивный усталыкыштым ончыктымаш.
Чыла участниклан именной дипломым, медальым, партнёр-влак деч пӧлекым да 89 педагоглан тауштымашым кучыктеныт.