Тыгай лӱм дене 26 июньышто Морко кундемыште «Колумб лудмаш–2026» регион-влак кокласе сылнымут да сем аршаш фестиваль-конкурс эртаралтын. Тений пайрем Морко посёлкышто лийын.
Ты гана регионлаште да Марий Элысе ола ден районлаште ойыртемалтше участник-влак М.Степанов лӱмеш тӱвыра да каныме рӱдерыште погыненыт.
Морко районысо рӱдераҥдыме клуб системе директорын инновационно-методический паша шотышто алмаштышыже Л.Ф.Кириллова мероприятий нерген тыгерак палдара:
– «Колумб лудмаш» тенийысе фестиваль-конкурсым «Сылнымут аршаш Моркышто» пайремыш ушенна. Конкурсыш ушнышо-влак кок площадкыште: Тӱвыра да каныме рӱдерыште да Янтемир лӱмеш тоштерыште – выступатленыт. 85 участникым ийгот да номинаций шот дене шеледыме: «Литератур» номинацийыште Колумбын возымо произведенийжым (марла да кусарыме) але шке возымо почеламутым лудыныт; «Музыкальный» номинацийыште Колумбын мутшылан возымо але шке возымо муро-влак йоҥгеныт. Ийгот шот дене икмыняр тӱшка лийын: шым ияш марте икшыве-влак, 8-10 ияш-шамыч, 11-14 ияш ӱдыр-рвезе-влак, 15-18 ияш-шамыч да 19 ияш деч кугурак-влак шкеныштым тергеныт.
Уэмдыме книгагудына тыгак мероприятийым эртарымашке ушнен: пашаеҥ-влак уремыште площадке-влакым ямдыленыт, тушто книгагудо дене лишкырак палдареныт, ӱдыр-рвезе-шамычлан икмыняр модмашым, викторинымат эртареныт.
Кажне участникым диплом да изирак пӧлек дене палемденыт, а шке ийготан-влак коклаште икымше верым налше-шамычлан кубокым кучыктеныт.
Кок номинацийыштат
Фестиваль-конкурсыш У Торъял район гыч Смирновмыт-Коте еш ансамбль ушнен. Татьяна Владимировна Александр, Артур ден Димитрий йыгыр эрге-влак дене сценыш лектын:
– Икмыняр ий ончыч ик мероприятийыште икымше выступленийна годым француз мурым мурымеке, марлат мураш кӱлеш манын шоналтышна. Шкеже марий улам, пелашем – француз, садлан икшывына-влаклан марий да француз йылме-влакымат туныктем. Тений музык номинацийыште Марий Эл Республикын калык артистше, чӱчӱэм Иван Смирновын мурымо мурыжым муренна, а йыгыр эрге-влак тыгак марла почеламутым лудыныт.
Шкеже, ӱдыржӧ да тунемшыже
Параньга район Матародо школышто тӱҥалтыш класслам туныктышо Л.В.Андреева конкурсыш кок участникым конден, шкежат сценыште выступатлен. Людмила Витальевнан Ангелина ӱдыржӧ В.Колумбын «Йӱд кушто ила?» почеламутшым сылнын лудын. А тунемшыже, 8 ияш Ева, «Шочмо йылме» почеламутым тунемын. Людмила Витальевна шкеже «Ава-влаклан» почеламут дене сценыш лектын.
– Ӱмаште Волаксолаште эртаралтше конкурсыш толынна, пеш келшен, садлан теният ушнаш кумылаҥынна. Йоча-влаклан почеламутлам ойырем да ямдылалташ тӱҥалына веле: урок деч вара, каникул годымат погынена. Сценыш лекме деч ончыч ӱдыр-влакым лыпландарем, поро мут дене кумылыштым нӧлташ тыршем, туге гынат шкемынат кӧргыштӧ тургыжланымаш шижалтеш, – Л.Андреева.
Вес ийын – чылан
Звенигово район Выльыпсола гыч Ивановмыт ешге, манаш лиеш, сценыш лектыныт. Алеся Валерьевна Вика, Вероника да Арина ӱдыржӧ-влак дене выступатлен. Арина эше кум ияш веле, садлан почеламутым ямдылен огыл, но вес ийын изи падырашат чолгалыкшым ончыкта манын палемдыш авашт да ешарыш:
– Вика тӱрлӧ конкурсышто шкенжым терга, марий газетлашкат возкала. Ты ганат вес номинацийыште посна сценыш почеламутым лудаш лекте. А мый шкеже марла почеламутым лудмо конкурсыш ик ганат ушнен омыл ыле. Садлан тургыжланымаш шижалтын. Ямдылалтынна чыла вере, манаш лиеш: мӧҥгыштат тӱрлӧ сомылым ыштыме годым, пакчаштат шӱкшудым сомлымо годым, автобусыштат.
Аважлан пӧлеклен
Морко район Эҥерсола школышто шымше классым тунем пытарыше Мария Николаева шке таҥашыже-влак коклаште шке возымо почеламутшо дене икымше верым налын. «Кум нӧргӧ салтак» почеламут дене сценыш лектын. Ӱдыр ойла:
– Тиде почеламутемым авам Галина Николаевналан пӧлекленам. Тудо мемнам, куд икшывым, ончен куштен. Кум изам Шочмо элым аралымылан илышыштым пӧлекленыт: Андрей ден Илья специальный военный операцийыште улыт, Кирилл тунемеш – военный лияш ямдылалтеш.
Мария – пеш чолга ӱдыр, шкенжым ятыр конкурсышто терга да эре гаяк ончыл верыш лектеш.
Уста мутмастар, марий поэт-новатор В.Колумб лӱмеш фестиваль-конкурсышто сеҥалтше лийын огыл, вет тургыжланымашым да лӱдмашым сеҥен сценыш лекташат – сеҥымаш. Марий сылнымутым пагалыше йолташ-влак, тыгаяк чолга лийза да Морко кундемыште вес ийын вашлиймеш!