Кызыт самырык-шамычлан тӱрлӧ шонымашым илышыш шыҥдараш интернет сайынак полша. Тушто ятыр идейым муаш лиеш. Тӱҥжӧ – кумыл. Теве Волжский район Упшер ялыште шочын-кушшо Анастасия Охотникован сад-пакчажым йомакысе сӱрет дене таҥастараш лиеш.
Шке пӧрт, сад-пакча
– Кок ий ончыч Сергей таҥем дене Йошкар-Ола воктенысе Новотроицк ялыште пӧртым налынна. Ончыч пачеран лияш шоненна, но коктынат ялыште шочын-кушшо улына, садлан пӧртым ойыренна. Тидын шотышто ик ганат ӧкынен огынал. Кызыт сурт-печына – мемнан чон куанна.
Шке пӧртан лиймеке, пуйто ала-могай ситыдымашым шижынна. Мыланна теплице, росота кӱлыт – шоналтенна. Вигак манме гай тӱрлӧ озымлан рокым, кашпом ямдылкалаш тӱҥалынам. Тылеч ончыч сад-пакчасе сомылым шкевуя ик ганат вораҥдарен омыл гынат, лӱдмаш лийын огыл. Тӱрлӧ кушкылым ончен-куштымо, садым моторын сылнештарыме шотышто интернетыште шуко материалым онченам. Тыгак авам шке каҥашыже-влак дене эреак полшен. Кунам пашамын лектышыжым ужынам, кажне шытышлан йывыртенам, – каласкала Анастасия.
Ӱдырын йӧратыме Сергей таҥже чыла пашаланат мастар кидан рвезе. Тудо шке кидше дене сад-пакчалан ойыртемалтше изи теплицым ыштен. Тушко ӱдыр ден каче икымше ийынак кияр ден помидорым шынденыт.
– Икымше ийынже шуко шынден огынал, эксперимент семын 3-4 вондым веле куштенна. Тений, мутлан, кок йыраҥлан ешаралтын. Ынде киярат, помидорат ситышын шочыт, но утыждене огына толаше. Шканна ситыше пакчасаскам веле шындена. Тыгак салатлан тӱрлӧ ужар кушкыл, мӧр да снеге йыраҥ-влак улыт. Шке ончен-куштымо пакчасаскалан нимо огеш шу. Нуно моткоч тамле да лӧза улыт. Садлан лектышым йывыртен погена.
Тылеч посна кажне ийын саднам тӱрлӧ вондер дене пойдарена. Вишне, шоптырвондо, эҥыжвондо, ошкиза одарланен кушкыт да шке саскашт дене куандарат, – ойла самырык сад-пакчазе.
Пеледыш – суртым сылнештара
Тений Анастасия садшым тыгак тӱрлӧ пеледыш дене тӱзатен. Тидлан оласе пазарыште петуний, калибрахоа, герань, виола пеледыш росота-влакым наледен шынден.
– Пазарыште могай-гына пеледышым огыт ужале?! Ойырымо годым кузе гын чыла наледен каяш огыл, шоненам. Иктыже весыж деч чоным савырат. Шошым шындыме росота-шамыч кызыт моткоч сӧралын пеледыныт. Нуным ончен, чонем куана, – мутланымашым умбакыже шуя ӱдыр.
А.Охотникова ончыкыжым садыштыже шукияш пеледыш-влак гыч клумбым ышташ шона. Тидлан кызыт тӱрлӧ сорт пеледышым шымла. Ял гыч ик ганат яра кид дене огына тол, авана-шамыч эреак могай-гынат пеледышым пуэн колтат, манеш.
Чоным пыштен
Анастасиян сад-пакчажым ончен, тушто чылажымат чоным пыштен ыштымым шижат. Кажне пеледыш, кушкыл пуйто ӱдырын йӧратымашыж дене пеледеш. Тудын кидше, чынжымак, лывырге да шӧртньӧ. Сурт-печыжат сӧралрак лийже манын, шке кидше дене ыштыме тӱрлӧ моторлыкым пурта. Макраме дене пӧртыштыжӧ мотор декорым келыштара, тыгак пидеш да пу гыч сылне арвер-влакым шочыкта.
– Пӧртым, сад-пакчам шке кид дене ыштыме арвер-шамыч дене сылнештараш моткоч келша. Тыгай паша-влак сурт-печылан шкешотан чон-ласкалыкым, ямым ешарат. Мый изинек пу гыч тӱрлым пӱчкедаш йӧратем. Тидыже, очыни, ачам деч мыланем куснен.
Кызыт интернетыште кеч-могай пашалан кумылаҥаш лиеш. Южгунам идей-влак шкеак шочыт. Теве садыште иктаж-могай моторлыкым ыштет, тидлан йывыртет. Вара адак иктаж-мом шочыкташ таранет. Но кеч-могай пашаштат тӱҥжӧ – йӧратымаш. Тидланже Сергейлан кугу тау. Тудо мыйын кеч-могай шонымашемым поддерживатла да илышыш шыҥдараш полша. Вет таҥемын кид-йолжо моткоч уста. Ме шуко пашам пырля шуктена, пӱртӱсым да йырым-йырысе моторлыкым йӧратена, – палемда А.Охотникова.
Чынжымак, йӧратен ыштыме пашан лектышыже шинчалан вигак перна. Анастасия ден Сергейын сад-пакчашт – тидлан пример. Тек самырык еҥ-влакын эше ятыр идейышт илышыш пурталтеш, пакчасаскашт лектышан лиеш, пеледышышт куандарен пеледеш.