Параньга посёлкысо Б.Р.Ахматьянова лӱмеш школышто тунемше Дарья Чешева «Университетские смены» программыш ушнен да И.Н.Ульянов лӱмеш Чуваш кугыжаныш университетыш миен коштын.
Программе почеш ӱдыр отрядше дене пырля университет илыш дене палыме лийын, оласе предприятийлаш лектын коштын, экскурсийлаште шуко ум пален налын. Тыгак нунылан оҥай лекций-влакым лудыныт, икымше полышым пуаш туныктымо мастер-класс-влакым, треннингым эртареныт.
– Чувашийыш миен коштмо кужу жаплан шарналт кодеш. Чебоксар да Мариинский Посад олала мучко экскурсий-влак эн чот келшеныт, а станций ден модмаш-шамыч, тыгак гитар сем почеш мурымо, дискотеке да моло мероприятий отряднам икояным ыштеныт. Чуваш кугыжаныш университетыште лийме мондалтдыме шарнымашым да у йолташ-влакым пӧлеклен!» – палемда ӱдыр.
«Университетские смены» туныктымо-туристский программе-влак «Молодёжь и дети» нацпроектлан келшышын эртаралтыт.