Марий Элым Вуйлатыше Россий Правительстве пеленысе Финансовый университетын студентше-влак дене вашлийын да республикын социально-экономически виямыж нерген каласкален.
«Высшая школа управления» факультетысе ончыкылык вуйлатыше-шамыч дене Юрий Зайцевын вашлиймашыже «Study-tour: опыт регионального управления» инновационно-образовательный проект кышкарыште эртен.
Регионым Вуйлатыше республикын вияҥ толмо корнылаж дене палдарен, тыгодымак образований да молодёжный политике йодышлам тарватен, йырымваш йӧнан илышым да экологий лӱдыкшыдымылыкым ыштыме, кӱкшӧ технологиян производствым уэмдыме, инвестицийым кондымо нерген ойлен.
– Марий Эл промышленностьшо да ялозанлыкше дене виян. Республикыштына эллан стратегически кӱлешан предприятий-шамыч пашам ыштат. Информационный технологий, изи да кокла бизнес да, мутат уке, туризм ончыко каяш полшат. Регионышто Промышленностьым вияҥдыме фонд ден Инвестицийым вияҥдыме фонд пашам ыштат, – палемден Юрий Зайцев.
Тудо экономикыште, промышленностьышто, ялозанлыкыште пашан саеммыж да турист-влакым шукемдыме шотышто каласен. Поснак самырык тукымым у шонымашлаж дене сай вашталтышлан полшышо вий семын палемден.
Студент-влак Юрий Зайцевлан национальный политике, санкций жапыште бизнеслан кугыжанышын полышыжо, экономике сферыште кугыжанышын терген шогымыжо да ивестиций шотышто тыршымыж нерген йодыштыныт, кугыжаныш вуйлатымаште моло темымат нӧлталыныт.
– Элнан Президентше Владимир Владимирович Путин тергымашым чын эртарыме нерген ик гана веле огыл ойлен, тудо вияҥаш да инвестиционный климатым ышташ чаракым ыштышаш огыл. Тидымак кугыжаныш вуйлатыме пашаштат шотыш налман. Вет лачак кугыжанышын функцийжылан калыкын интересшым аралымашым шотлем, – палемден Юрий Зайцев вашмутым пуымыж годым.
Финансовый университетысе кугыжаныш да муниципальный управлений кафедрым вуйлатыше Ольга Панина Регионым Вуйлатышылан вашлиймашым организоватлымыжлан тауштен да «Study-tour» проект нерген каласкален.
Ты проект почеш тений студент-шамыч Марий Эл Правительстве да регионысо вӱдышӧ предприятий-влак, тыгодымак Марий машиностроительный завод ден Марбиофарм, нерген пален налыныт. Тидыже нунылан тунеммаште да практикыште полшышаш.