Параньга район Ондропсола ялын ӱдыржӧ Александра Антропова – «Движение Первых» толкынын чолга еҥже. Тудо эше тӱрлӧ аланыште шкенжын вийжым терга.
Марий самырык тукым слёт
Александра Матародо кыдалаш школышто 11-ше классыште тунемеш. Изинек мураш-кушташ йӧрата. Вич ияшыж годымак Ондропсола ялысе клубыш тӱрлӧ занятийыш коштын. «Поро эр» йоча ансамбльын участникше лийын. А кызыт «Поро кас» калык коллективыште мастарлыкшым тапта.
А.Антропова тылеч посна поэзийым йӧрата. 1-ше классыштак сылнымут конкурслашке ушнаш тӱҥалын. Параньга районысо Якимов, поэт-земляк-влак изак-шоляк Мансур, Расих да Магруф Гаязовмытлан пӧлеклалтше лудмашлаште, республик кӱкшытан Колумб лудмаште эреак призовой верым, утларакшым икымшым, налын. Чолгалык ӱдырым тений Йошкар-Олаште эртыше Марий самырык тукым слётыш конден.
– Слётын пашашкыже икымше гана ушненам. Марий улмем дене кугешнем. Слётышто ик шонымашан марий ӱдыр-рвезе-влак дене вашлийын, калыкнан тӱвыражым, йӱлажым, мурпоянлыкшым аклаш да йӧраташ кӱлмым эшеат чот умыленам.
Слёт пайдалын эртен. Мый проект-влакым чын возаш тунемынам, искусственный интеллект нерген утларак пален налынам. Йошкар-Оласе тоштерлаште лиймемат чоныштем келге кышам коден, – манеш Александра.
«Артек» лагерь
Саша жапшым пайдалын эртара. 2022 ийыште ӱдыр «Движение Первых» толкыныш ушнен. Ты толкынын чолга еҥже-шамычлан кундемыштына «Радужный» йоча рӱдерыште «Время Первых. Импульс» профильный смене эртаралтеш. А.Антропова ты сменыште ныл ий почела лийын. Ӱдыр сылне, келге шонымашан видео-влакымат ыштен мошта. Тудо каласкала:
– Матародо школыштына «МедиУм» медиарӱдерым чумырымо. Мый тудын участникше улам. Командына дене тӱрлӧ темылан пӧлеклалтше видеороликым войзена, пост-шамычым ямдылена, тӱрлӧ мероприятийым эртараш полшена. Пашана дене ВК соцкылыште рӱдерын сообществыштыже палдарена.
Чолгалыкемлан кӧра тений Крымыш «Артек» тӱнямбал йоча рӱдерын нылымше сменышкыже логалынам. Тудо 10 гыч 30 апрель марте шуйнен. Мый рӱдерын «Озёрный» лагерьыштыже лийынам. Тушто шкаланем теҥыз дене кылдалтше направленийым ойыренам. Кажне кече оҥайын эртен. Моло ӱдыр-рвезе-шамыч дене теҥыз пышкемым ыштен кылдаш, канатым шупшаш тунемынам, пушын чоҥалтмыже, семафор нерген пален налынам. Командына тыгак пуш дене теҥызыш лектын.
«Артекыште» школ уло. Тушкат коштмо. Концерт программымат ямдылыме. Севастополь олаште экскурсий дене лийме. Смене мучашлан «Артекысе» тӱрлӧ лагерьын участникше-шамыч спорт таҥасымашлаште вийыштым ончыктеныт. Шем теҥыз воктене жап оҥайын, веселан да пайдалын эртен.
Спорт
А.Антропова спорт дене заниматла. Баскетбол, тэг-регби дене модеш. «Вызов Первых» проектыш ушнен, спортын тӱрлӧ видыштыже шуаралтеш. «Зарница 2.0» военно-патриотический модмаште мастарлыкшым ончыкта. Районысо спорт таҥасымашлаш кумылын ушна.
Александра архитектур, дизайн аланлаште шкенжым ужеш. Выпускнице шкенан кундемысе веле огыл, Озаҥысе, Чебоксарысе да Москосо вузлашкат тунемаш пураш тыршынеже. Кызыт Саша ЕГЭ-лан кыртмен ямдылалтеш. Уш-акылжат, вий-куатшат ситат, шонена.