Июль тӱҥалтыште Волгоградыште допризывный молодёжьын спартакиадыже лийын. Кундемнан чапшым тушто Волжск округын командыже арален. Ты командын ик еҥже Владимир Александров лийын.
Рвезе Сотнур селасе школышто тунемеш, индешымше классыш вончен. Тудо спорт дене пеҥгыде кылым куча. Куштылго атлетикыште шкенжым шуара. Командыш логалаш манын, шкешотан ойырымашым эртен. Тылеч посна Вадим школын илышыштат чолгалыкым ончыкта. Тӱрлӧ проектыш, конкурсыш, фестивальыш, слётыш ушна. Тудын дене Йошкар-Оласе Калыкле сымыктыш гимназийыште Финн-угор йоча ден самырык-влакын тӱнямбал слётыштышт палыме лийна. Каласыман, ты слётышкат логалаш ойырымашым эртыман.
В.Александров каласкала:
– Спартакиадыште элнан тӱрлӧ регионжо гыч 38 команде таҥасен. Ме тушто лу кече лийынна. Кажне кечын кок тӱрлӧ дисциплиныште вийнам тергенна. Таҥасымаш-влак виян лийыныт, садлан шкем пеҥгыдын ончыкташ кӱлын. Тушто ме команде дене тӱшка зачётышто 11-ше верым налынна. Тиде удажак огыл, шонем, но эше тыршыман.
Спартакиаде деч вара вигак манме гай Финн-угор йоча да молодёжьын слётышкыжо ушненам. Тудынат – шке илышыже, ойыртемже да йогынжо. Слёт финн-угор калык-влакын икшывыштым ваш келшен, пагален илаш, икте-весылан эҥерташ туныкта. Тыгак историйым, тӱвырам, йӱлам, йылмым эшеат тунемаш да йӧраташ кумылаҥда. Садлан тушко логалмемлан моткоч йывыртенам.
Самырык рвезе шочмо марий йылмына дене сайын кутыра. Тудо тыгак физикым тунемаш, программированийым шымлаш келша, мане. Ончыкылык профессий нергенат шонкалымыжым ойлыш. Индешымше класс деч вара 10-шо классыш тунемаш пураш палемден. Владимирын чылажат шонымыж почеш лиеш манын ӱшанена!