Соцфонд увертара
СВО-што инвалид лийше ветеран-влаклан окса компенсаций гыч социальный услуго наборым (НСУ) налаш куснымо радам куштылемын.
Боевой действийын ветеранже-влаклан кажне тылзын тӱлымӧ выплатым палемдыме годым социальный услуго набор окса компенсаций семын пуалтеш. Ондак НСУ-мак налаш манын, Российысе Социальный фондын Марий Элысе пӧлкашкыже 1 октябрь марте йодмашым пуэн шукташ кӱлын, а оксам 1 январь гыч колтеныт. Ынде йодмашым возымо деч вара вес тылзынжак ты услуго дене пайдаланен кертыт.
СВО участник службо гыч кайымыж деч вара кум тылзе жапыште але инвалидностьым налме кече гыч (уволитлалтмеке, 12 тылзе жапыште пуэныт гын) услугым налме йӧным вашталтыме шотышто йодмашым возен кертеш. Мутлан, тений сентябрьыште йодмашым пуымеке, октябрьыштак услуго дене пайдаланаш праваже лектеш. А йодмаш кум тылзе деч вара возалтын гын, ончычсо семынак 1 январь гыч гына лиеш.
Социальный услугым писынрак налме радам инвалидностян ветеран ден СВО-што добровольческий формированийлаште лийше военнослужащий-шамычлан ышталтын. Йодмашым Госуслуго портал гочат пуаш лиеш.