11 гыч 13 сентябрьыште «Лесная сказка» туристический комплексыште Школ лесичестве-влакын регион-влак кокласе слётышт лийын.
Тений школ лесничестве слётым 30-шо гана эртарыме. Тушко 29 команде (чылаже 87 йоча) толын, тыгак школ лесничествым вуйлатыше да чодыра отрасльысе наставник-влак лийыныт. Кумшо гана слёт регион-влак кокласе статусан эртаралтын. Ты гана тышке Татарстан Республикын да Угарман кундемын командышт ушненыт.
Куяр лесничествыште инженерлан пашам ыштыше Татьяна Ворончихина – Куярысе школ лесничествын наставникше. Теве мом тудо мыланна тиде слёт нерген каласкалыш:
– Ме эн ончыч ветеран-влакым саламлымаште лийна. Тыгак пошкудо кундемла гыч толшо-шамычлан республикна деч шарнымашан пӧлекым кучыктышна. Варажым участник-влакым станцийлашке шеледышт, тӱрлӧ вер гыч толшо-влак посна командылашке (чылаже куд направлений почеш) чумыргышт. Тиде – «Лесная таксация», «Защита леса», «Лесная охрана», «Лесовосстановление», «Лесная наука», «Заповедные территории». Тыге икте-весе дене палыме лияш, ончыкыжымат келшаш йӧн почылтын.
Мый Куяр школ лесничествын наставникше улам. Мероприятийыш ты школ лесничестве гычат миеныт да шинчымашыштым тергеныт.
Шкеже «Левосстановление» тӱшкаште лийынам. Тушто улшо йоча-шамыч дене пырля «Лесовод да тудын командыже» сценкым ямдылышна. Нуно чодырам уэмдымаште лекше нелылык нерген модын ончыктеныт. Тыгодым иктешлымашым ыштенна: эреак шке шинчымашлан ӱшаныман, а кызытсе жапысе техникылан огыл.
Кум кече жапыште слётын участникше-влак дене пырля Чодыра да пӱртӱсым аралыше институтын волонтёржо-шамыч лийыныт, нунылан чыла йыжыҥыште полшеныт.
Икымше верым Йошкар-Оласе 21-ше номеран школ лесничествын «Экоспектр» командыже налын. Кокымшо верыште Марий Турек школын «Берендей» ден Угарманысе Вахтан школын командышт суленыт. Кумшо верыште – Волжскысо экологий рӱдер ден Татарстанысе команде улыт.