Марий Элысе школлаште тунемше-влаклан эртаралтше призыв деч ончычсо ийготан Российысе молодёжьын спартакиадыжын сеҥышыже-влакым палемденыт.
24 апрельыште Йошкар-Оласе «Марий Эл Арена» манежыште спартакиадын кеҥежымсе йыжыҥже лийын. Тушто 111 тунемше 100 да 3000 метрым куржмаште, иймаште да лӱйкалымаште вийжым терген. Тылеч ончыч 21 мартыште Звенигово оласе «Жемчужина» базыште спартакиадын телымсе йыжыҥже эртаралтын. Республикысе 11 район гыч школьник-влак ече дене куржмаште, кирам нӧлтымаште, пневматический винтовко гый лӱйкалымаште таҥасеныт.
Кок йыжыҥым иктешлен, сеҥыше команде-влакым палемденыт:
1 вер – Волжский округ
2 вер – Советский район
3 вер – Марий Турек район.
Марий Элысе Спорт министерствын сайтше гыч налме фото-влак.