«Сеҥымаш диктант» тӱнямбал исторический акций деч ончыч Йошкар-Олаште «Сеҥымаш автопробег» лийын
Мероприятийыш ятыр участник – Калык фронтын, «Молодая гвардия Единой России» ушемын, республикысе мер организаций-влакын активистышт, Марий кугыжаныш университетын да Поволжский кугыжаныш технологичесий университетын студентышт – ушнен.
Российын да Марий Элын флагышт дене сӧрастарыме автоколонно Ленин площадь гыч тарванен Йошкар-Ола уремла мучко кудал эртен, еҥ-влаклан «Сеҥымаш диктант» нерген ушештарен.
Автопробегын ик чолга организаторжо да участникше Марий Элысе Кугыжаныш Погын председательын алмаштышыже Александр Майоров каласен:
– Автопробег тукым-влакын икоян улмыштым ончыкта, тудо совет калыкын повигше нерген шарнымаш россиянин-влакын шӱмыштышт илыме нерген ушештара. Кугу Ачамланде сар годымсо гаяк тачат мемнан задачына – историй чыным аралаш, герой-влакым пагалаш да ты шарнымашым йоча ден уныка-влаклан кодаш.
«Сеҥымаш диктант» 2026 ийыште Кугу Отечественный сар тӱҥалмылан 85 ий да маршал Георгий Жукоын шочмыжлан 130 ий теммылан пӧлеклалтын. Марий Элыште ты акцийым эртараш 300 утла площадкым ямдылат. Нунын кокла гыч эн тӱҥжӧ 24 апрельыште Йошкар-Олаште Калык-влакын келшымаш пӧртыштӧ почылтеш.
«Сеҥымаш диктантым» возаш площадке Кугыжаныш Погыныштат лиеш.
Кугыжаныш Погынын колтымо фото-влак.