Кодшо кечылаште Марий Элым Вуйлатыше Юрий Зайцев газификаций шотышто регионысо штабын заседанийжым эртарен.
Тушто эн ончычак 2021-2025 ийлаште Газоснабжений ден газификацийым вияҥдыме программым шуктымым иктешленыт да 2026-2030 ийлан планым палемденыт.
2025 ийыште республикыштына 147 км газпучым шупшмо, тышеч 96 км догазификаций программе почеш ышталтын. Газ Марий Элысе куд район ден округласе эше 12 населённый пунктыш миен шуын. Канде тул дене 5000 утла сурт пайдаланаш тӱҥалын, 2000 утлаже – догазификаций программе почеш. Ынде Марий кундемыште 80,5 процент калык газ дене пайдалана, тидыже Российысе кокла показатель деч кугурак.
Кодшо ийын сад участкыласе пӧртлашке догазификаций йӧн дене газпучым шупшмылан да калыклан социальный полышым пуымылан кугу тӱткыш ойыралтын. Паша да калыкым социально аралыме министерстве льготник-влаклан субсидийым ойырен шоген, тыгодымак СВО участник ден нунын ешыштлан, йорлын илыше еш-влаклан полшен. 2025 ийыште тидлан 14 млн утла оксам кучылтмо, субсидийым 651 еҥ налын. Теният тыгай полыш пуалтеш.
2026 ийыште У Торъял районысо Шура, Шемшӱргӧ, Талманъял, Алыксий, Крӱк, Оршанке районысо Нольвож, Нужавлак, Кугу Немдеж, Яндыган, Морко районысо Тат-Кушна, Нурӱмбал, Кугу Шоръял, Яксола (Ядыксола) да Семисола яллашке газым пурташ палемдыме. А котельный-влакым пӱртӱс газыш кусараш 40 млн наре теҥге ойыралтеш.
Тыгак заседанийыште топливно-энергетический балансын прогнозшым, газоснабжений ден газификаций схемым каҥашеныт.