ОРШАНКЕ район Кугунур школын 6-шо классыштыже тунемше Аня Козлова СВО-што улшо-шамычлан шке семынже полша. Тудо ынде кумшо ий сакыр гыч «петушок-влакым» ышта. Кажне гуманитарный полышыш Козловмыт тамле кочкышан коробкам кондедат. Чылаже салтак-шамычлан Аня деч 4000 наре сакыран «агытан» миен шуын.
Ондак Козловмыт тудым шкаланышт ямдыленыт, кызыт – боец-влаклан. Ик кастене нуно 30 леденец дене кок партийым ыштат. Формышт ырымеке, шуко жап йӱкшыктарыман, сандене кок партий веле шотлан толеш. А чыла сай да моторын лекше манын, ты сомылым чот писын ыштыман.
Анян ачаже Семён Семёнович «петушоклан» тӱрлӧ форман пу шпажкым пӱчкеда. Тудымат ямдылен шуктыман. Тыге торасе Марий кундемын изи ӱдыржӧ деч салтак-влаклан шочмо велым да йоча жапыштым шарныктарыше пӧлек мия. Тидлан боец-влак куанат да мӧҥгеш пӧртылаш вийым налыт.
– Ме «петушокым» кумшо ий ыштена. Тений веле шотлаш тӱҥалынна. Теве У ий деч вара 1165 шере сийым ямдыленна, эн шукыжо 515 леденецым иканаште колтенна.
Аня ешыште – кумшо йоча. Тудын изаж ден акаже улыт, нуно пашам ыштат. Акаже Елена Семёновна Козлова Кугунур школыштак воспитаний шотышто советниклан пашам ышта, тыгак технологийым туныкта. Шукыж годым сакырым шке налына. Ты шотышто Кугунур туныктышо коллектив полшен ыле. Шукерте огыл ик ӱдырамаш 1000 теҥгем колтен, тудлан кугу таум каласена.
Мемнан родо-тукымнат СВО-што улыт. Когыньыштын илышышт кӱрылтын. Весыштым Юмо аралыже. Чыла салтак верчат чонна йӱла. Меже шокшо пӧртыштӧ илена, йытыра вакшышыште малена, кочкына, йӱына, каналтена, воштылына, а салтак-влак сарыште мыняр йӧсым ужыт, – каласкала Анян аваже Зинаида Алексеевна.
Тудо шкежат вургемым ургаш полша. Яра жапше улмо годым флис гыч толстовкым, балаклавым, кум парнян перчаткым, семейный трусикым урген.