Пытартыш жапыште спецоперацийын ветеранже-влакын да нунын ешыштлан у полыш ешаралтынак шога.
Герой-влакын тазалыкышт верч азапланымаш социальный политикын кӱлешан ужашыжлан шотлалтеш.
Кодшо кечылаште Марий Элым Вуйлатыше Ю.Зайцевын 2025 ийлан отчётыштыжо палемдымыж почеш, кызыт Марий Элыште илыше-влаклан 124 тӱрлӧ кугыжаныш полыш пуалтеш, тышеч 69-шыже – региональный, тидлан 2025 ийыште 9,8 млрд теҥге ойыралтын.
Реабилитацийлан – средства
СВО ветеран-шамычын реабилитацийыштлан технический средствам налаш йӧн уло. Нунылан протезым, спорт дене заниматлаш кресле-коляскым, адаптивный вургемым, сусыргымо деч вара тӧрланаш тренажёрым, ешартыш функциян кресле-коляскым, пылышлан аппаратым да молымат налын пуэн кертыт.
Тидым ветеран илыме верыштыже «Защитники Отечества» фондын филиалыштыже йодшаш. Социальный координатор йодмашым возаш да кӱлеш документым погаш полшышаш. Ветеран лӱм дене вес еҥ лектеш гын, пеленже паспортшым да доверенностьым налшаш але тидым ышташ полномочийже нерген вес документ лийшаш.
«Защитники Отечества» фондын Марий Элысе филиалже тыгай полышым пуаш тӱҥалме жап гыч 50 еҥлан адаптацийым эртарен, 13 тренажёрым налын пуэн, а кок еҥлан электрон сертификатшылан ешартыш оксам тӱлен. Республикысе 43 ветеранлан адаптивный вургемым ойырымо. Куд еҥлан спортивный протезым да тынар еҥланак тыглай кресле-коляскым налын пуымо. А ешартыш функциян у кресле-коляскан 9 геройна пайдаланаш тӱҥалын.
Республикыштына следж-хоккей дене «Ратник» командым чумырымо. Тусо 16 еҥлан модаш келыштарыме кресле-коляскым ойырымо.
Тазалыкышт шерге
Марий Элыште илыше ветеран-влаклан региональный полыш семын пӱйым протезироватлыме роскотлан компенсацийым пуымаш шотлалтеш.
Тыгай йӧн лекме деч вара Марий Эл Республикысе Паша да социальный аралтыш министерствын полшымыж дене 17 геройлан пӱй протезированийлан роскот оксам пӧртылтымӧ.
Угыч тунемыт
СВО ветеран-шамычлан, мӧҥгыш толмекышт, сай пашадаран пашам муышт манын, тунемаш пураш йӧнымат ыштыме.
Вет нунат шке ешыштышт эҥертыш да эллан пайдале еҥ лийнешт. Сандене «Защитники Отечества» фонд тунеммылан да паша верым мумылан кугу тӱткышым ойыра. Тидлан фонд, тунемме заведений да партнёр-влак дене вашкыл шотышто ойпидышым ыштыме – тидыже ветеран-шамычлан квалификацийыштым нӧлташ полша.
Тачысе кечылан Марий Элыште илыше 72 ветеран тыгай корным ойырен налын. Нуно Москосо «Синегерия» финансово-промышленный университетыште, Российысе «Нетология» компанийын образовательный онлайн-платформыштыжо, Волгатехыште, МарГУ-што, Бауман лӱмеш МГТУ-н подготовительный курсыштыжо да моло вереат тунемыт. Тыгодым юрист, менеджер, БПЛА оператор да вес профессийла денат шинчымашым погат.
Менеджерлан тунемын
СВО ветераным тынысле илышыш пӧртылаш иктаж-могай профессийлан тунеммаш полша.
Спецопераций деч ончыч Вячеслав Васильев профессионал триатлонист лийын. Тудо Российын, Европын да тӱнямбал Кубокыштышт элнан чапшым арален, чемпион лӱмым сулен.
Вячеслав передовойыш кок командировкыш миен толын. Жуковын медальже, Россий обороно министерствын «За укрепление боевого содружества» медальже дене палемдалтын. «Лентычке» гыч пӧртылмеке, шочмо республиклан кӱлешан лияш шонымаш дене ила. Санденак «Нетология» образовательный платформышто «Менеджер проектов» программе дене тунемын.
– Тау «Защитники Отечества» фондлан да региональный филиалым вуйлатыше Ренат Зуфарович Магсумовлан полшымыжлан. Марий Элым Вуйлатыше Юрий Зайцевлан ветеран сообществылан кугу тӱткышым ойырымыжлан посна тауштем. Ончыкыжымат Триатлон федерацийын региональный отделенийже дене спортын ты видшым республикыштына вияҥдаш шонем, – ойла Вячеслав Владимирович.