Йошкар-Олаште Ойганен шарныме кечылан пӧлеклалтше митинг эртаралтын.
Воин чап мемориал воктене Марий Элым Вуйлатыше Юрий Зайцев ветеран, тылын труженикше да олаште илыше-влаклан ойлымыж годым палемден: 1941 ийысе 22 июнь – Российын историйыштыже ик эн ойганыме кече.
– Ты кечын Кугу Отечественный сар тӱҥалын, кудыжо мемнан миллион дене еҥнам пытарен. Тудо 1418 кече шуйнен да 27 миллион илышым наҥгаен. А Марий республик сар нерген уверым Марий автономийын 20 ий темме кечын вашлийын. Кундемысе шӱдӧ дене еҥ фронтыш каяш кумылжым ончыктен. Элнан тылжылан эвакуироватлыме промышленный предприятий ден организаций-влакым, калыкым вераҥдаш кӱлын. Йошкар-Ола сар жапыште икмыняр воинский частьым да подразделенийым шке шулдыржо йымаке налын да действующий армийлан шотлалтын, – каласен регионым Вуйлатыше.
Сар жапыште Марий АССР гыч фронтыш 140 тӱжем наре еҥ каен, 75 тӱжем еҥ вуйым пыштен. Марий мландыште шочшо 36 землякна Совет Ушем Герой лийын.
Марий Элым Вуйлатыше ешарен:
– Таче нацизм еҥ-влаклан лӱдыкшым ышта, шоя факт-влакым историйышкына шыҥдарынешт. Но мемнан еҥ-влак Кугу Отечественный сар жапысе семынак Шочмо элнам патырлын аралат, эрык да Российын зависитлалтдымыже верч шогат.
Мероприятий годым Россий мучко ик минут шып шогымо йӱлашке ушненыт. Вара Марий Элым Вуйлатыше Юрий Зайцев, Кугыжаныш Погынын Председательже Михаил Васютин, кучемысе орган-влакын да мер организаций-шамычын еҥышт Воин чап монумент да Курымашлык тул воктеке гирлянде ден пеледышым пыштеныт.
Эльвира Терентьева.
Воин чап мемориал воктене.
Марий Элым Вуйлатышын пресс-службыжын фотожо.