Марий Эл Республикын Кугыжаныш Погынжын Председательже Михаил Васютин Кугу Отечественный сарын ветеранже Валентина Павловна Федоровам Сеҥымаш кече дене саламлен, пеледыш аршашым да шарнымашан пӧлекым кучыктен.
Валентина Павловна 1923 ийыште Татарстан кундем Бондюга районысо Русские Сарсазы ялыште шуко шочшан ешеш шочын. Сар деч ончыч Бондюга ялыште илен, школышто тунемын да ургымо производствышто ыштен.
1942 ий февральыште санинструктор-влакым ямдылыме курсым пытарымекыже, фронтыш наҥгаеныт. 382-шо запасной полкын санитарный ротыштыжо служитлен, уло сарым эртен, сусырген. Сеҥымаш кечым Мӱндыр Эрвелне вашлийын, тушто Японий ваштареш сарыште участвоватлен. Мӧҥгӧ 1945 ий ноябрьыште веле пӧртылын.
Сар деч вара Валентина Федорова 20 ий наре Астана олаште йочасадыште воспитательлан ыштен, вара Екатеринбургыш куснен, варарак – Йошкар-Олашке, кызыт тыште ӱдыр-веҥыж дене пырля ила.
Валентина Павловна II степенян Отечественный сар орден, Жуковын медальже, «За боевые заслуги», «За взятие Будапешта», «За взятие Вены», «За освобождение Белграда», «За победу над Германией в Великой Отечественной войне 1941-1945 гг.» да моло медаль ден грамотла дене палемдалтын. 2025 ийыште ветеранлан «Йошкар-Олан почётан гражданинже» чап лӱмым пуымо.
Кугыжаныш Погынын колтымо фото-влак.