Кодшо изарнян Марий Эл Кугыжаныш Погынын Президиумжо «Марий Эл Республикысе муниципальный образований-влакын советышт» ассоциаций дене вашлийын. Нуно икте-весе дене пырля шуктымо пашаштым иктешленыт. Тыгак Советский, Медведево районлаште да Йошкар-Олаште Молодёжный парламент дене пырля тыршымаш нерген каласкаленыт.
Программе почеш
Погын ден Совет 2025-2029 ийлан пырля ыштышаш программым пеҥгыдемденыт. Заседанийым, паша вашлиймашым эртарат, уверла дене вашла палдарат да законопроект-влакым пырля ончат. Тидыже верлаште улшо нелылыкым умылаш, муниципалитетлам законым ямдылымашке ушаш полша.
Тений икымше пелийыште муниципалитетлам вуйлатыше – Депутат-влак погынымашлан председательышт Кугыжаныш Погынын кум сессийыштыже, кок Депутат кечыште, «Правительстьвенный шагатыште» лийыныт, законым каҥашымашке ушненыт.
Верысе самоуправлений реформо шотыштат паша сайын ышталтеш: Кугыжаныш Погынын депутатше-влакын полшымышт дене Волжский, У Торъял, Шернур, Курыкмарий округлам ыштыме, вашке Юрино район округыш савырна. Тыгак Курыкмарий, Кужэҥер округлаште да Юрино районышто яллам иктыш ушымо дене газпучым шупшмо программыш ушнен кертме.
Йодметым шуктат
Заседанийыште Марий Элыште илыше-влакын наказыштым «Единый Россий» партийын Калык программыж дене келшышын шуктымышт нергенат ойлышт.
Теве Кугыжаныш Погынын Советский районысо депутатше-влакын калык йодмашым илышыш шыҥдарымышт нерген Советский район вуйлатыше Сергей Халтурин деч колна. Колянур ялыште сайлыше-влакын наказыштым шуктымо: ик участке корным олмыктымо. Тыгак тиде ялысе Теннисный уремын икымше вончымо верыштыже (переезд) мланде эре вӱд йымаке логалын улмаш. Тыгай нелылык шотышто тушто илыше-шамыч шукертак йодмаш дене лектыныт – ты сомылым Кугыжаныш Погын 2026 ийыште наказ почеш ворандарышаш объектлан шотлен да пашажым икымше пелийыште шуктен. Ышталтше кумшо наказ Солнечный кыдалаш школышто тунемме класслаште тӧрза-влакым вашталтымаш да у пластик окнам шындымаш лийын.
Сандене шке йодмашдам погынымашлаште ойлаш ида ӧр. Ты але вес пашам шукташ манын, посна списке ышталтеш. Пашалан мыняр теҥге кӱлмым шотлат, документым Кугыжаныш Погыныш колтат, а тушто посна идалыкыште шуктышаш наказ-влакым палемдат, пунчал дене пеҥгыдемдат.
Сай пример
Медведево район вуйлатыше – Депутат-влак погынымашын председательже Рузяль Усманов Молодёжный парламент дене пашам ворандарымыж нерген ойлыш.
Медведево районышто VI созывын Молодёжный парламентше 2025 ий 23 апрельыште шочын. Икымше кече гычак профильный комитет-шамыч пашам ыштат: социальный йодыш; добровольчестве ден патриотизм шӱлышеш воспитатлымаш; тӱвыра, образований да спорт; мер ушемла дене кылым кучымаш дене.
Молодёжный парламентын активистше-влак проект ден грант пашам чолган шуктат. Тусо команде тений икымше тургымышто «Росмолодёжь. Гранты» конкурсышко ушнен. Нуно кок инициативе дене лектыныт: районысо кумдыкым уэмдымаш да молодёжьым икте-весе дене келшен илаш виктаралтше сомыл. Тидлан Депутат-влакын районысо погынымашыже консультацийже да ресурсшо дене полшен.
Молодёжный парламентын инициативыж дене самырык-влак дене пашам виктараш манын, тунемше-влакын самоуправленийыштым вуйлатыше ден медиаспециалист-влакын кок советыштым ыштыме.
Рамкыш:
Тений пелийыште Медведево районысо Молодежный парламент 10 заседанийым эртарен (комитетшынат тышке пуртымо), 109 мероприятийым организоватлен. Тылеч посна ВКонтакте тӱшкашкыже 500 утла подписчикым поген, тушан пашаж нерген 267 постым вераҥден. А чумыржо 3000 утла еҥын мероприятийыш ушнымыж нерген ойлаш лиеш.