2025 ийыште кундемыштына йоча шочмашым ешараш манын, «Еш» нацпроект почеш мӱшкыравн студентке-влаклан ик гана тӱлыман выплатым (100 тӱжем теҥге) пуаш тӱҥалыныт.
Тудым кыдалаш да кӱшыл шинчымашым пуышо тунемме тӧнежлаште очно тунемше ончыкылык ава-влаклан келыштарыме лийын гын, ынде Марий Эл Правительствын 2026 ий 31 мартысе 89-ше номеран пунчалже почеш, икмыняр вашталтышым пуртымо. Тудын дене келшышын, выплатым налаш очно, заочно, очно-заочно тунемше студентке-шамычланат йӧным ыштыме. Тыгодым ончыкылык ава оксам тӱлен але бюджетыште тунемеш шотыш огыт нал.
Выплатым кӧ налын кертеш:
- ончыкылык ава Российын гражданинже лийшаш да Марий Элыште илышаш;
- Марий кундемыште верланыше кыдалаш але профессионал шинчымашым пуымо тунемме тӧнежыште тунемшаш;
- ончыкылык аван 12 арня деч шукырак мӱшкыран улмыжо пеҥгыдемдалтшаш. Тыгодым выплатым налаш 6 тылзе деч ончыч пуыман;
- Мӱшкаран улмо шотышто медицине тӧнежыште учётышто шогымым пеҥгыдемдыше запись кӱлеш.