Эртыше каныш кечылаште Морко район Эҥерӱмбал Шале ялыште спецоперацийын участникше, ӱмыр лугыч лийше салтакым Евгений Титовым шарныме лӱмеш куштылго атлетике дене куржталмаш лийын.
Мероприятийым эртараш волонтёр-влак полшеныт. Участник-влакым саламлымашке да сеҥыше-шамычым палемдымашке «Марий Эл Талешке-влак» кадровый программын выпускникше, Морко районысо спорт да физкультур пӧлкам вуйлатыше Руслан Панин толын.
Евгений Титовым шарныме лӱмеш куштылго атлетике дене куржталмашым ты кундемыште 2024 ий годсек эртарат. Тудлан шочмо сурт пырдыжышкыже шарнымаш оҥам пижыктыме деч вара тӱҥалтышым ыштеныт. Молгунамсе семынак куржталмашке районысо, пошкудо кундемласе тале спортсмен-влак эреак толыт. Вет Евгений шкежат нунын радамыштышт лийын. Рвезе Йошкар-Оласе Олимпийский резерв училищыште куштылго атлетике дене мастарлыкшым таптен. Сай лектышым ончыктен, ятыр наградым сулен. Спортын ты видше дене кокымшо кугыеҥ разрядым шуктен.
2023 ий 4 ноябрьыште Е.Титов Запорожский областьысе Водяное села верч кредалме годым геройла колен. Командованийын заданийжым шуктымо годым лӱддымылыкым да патырлыкым ончыктымыжлан Патырлык орден (колымекыже) палемденыт.
Герой-землякна Морко район Эҥерӱмбал ялыште шочын-кушкын. Спортым изинекак йӧратен. 2013 ийыште армийыш каен. Службым эртыме деч вара эше кум ий контракт почеш служитлен. Тылеч вара ик жап Моско олашке вахте йӧн дене пашаш коштын, вара Шолэҥер посёлкысо шыл-комбинатыште тыршен. Спецоперацийыш мобилизаций почеш логалын.