Марий Элым Вуйлатыше Юрий Зайцев 2026 ийыште спортсмен-влаклан спортивный стипендийым тӱлаш палемдыме кӱштымашыш кидпалыжым пыштен.
Кундемыштына тыгай стипендий икымше гана палемдалтеш. Тудо Российысе да тӱнямбалысе таҥасымашлаште сай лектышым ончыктышо атлет-влаклан ойыралтеш. Регионысо спорт федераций-влакын йодмашыштым ведомство-влак кокласе комиссий да мер организаций-шамыч шымленыт. Тыге Марий Эл Вуйлатышын стипендийжым налаш тӱҥалше икымше 14 еҥым палемденыт. Июньышто спортсмен-шамычлан тылеч ончычсо тылзыланат выплатым тӱлат. Стипендиат-влак коклаште иймаш, байдарке дене вӱдым куэн ийме да каноэ, спортивный кучедалмаш, начарын ужшо/сокыр (мини-футбол 5х5 В1), начар вуйушан (тӱшка иймаш) спортышто сай лектышым ончыктышо спортсмен-шамыч улыт. Стипендийын кугытшо могай таҥасымашыште вийым тергыме да могай верым налме деч шога. Эн кугу выплате 30 тӱжем теҥгеш шуэш.