Медведево районысо рӱдӧ эмлымверын Руэм посёлкысо врачебный амбулаторийыштыже участковый терапевт Олеся Кузнецова пашам ышташ тӱҥалын. Республикыштына «Земский доктор» программе почеш тений договорым ыштыше врач-влак кокла гыч – иктыже.
О.Кузнецова МарГУ-со Медицине институтым 2021 ийыште тунем пытарен. Йошкар-Оласе 4-ше №-ан поликлиникыште ик жап тыршен. Ӱдыржӧ шочмеке, Медведево районысо рӱдӧ эмлымверын коллектившын еҥже семын земский программыш ушнаш шонен пыштен.
Руэмысе врачебный амбулаторийым вуйлатыше Екатерина Семковская шкежат – земский доктор. Тудо МарГУ-м ӱмаште тунем пытарен да вигак Руэмыште пашам ышташ тӱҥалын. Пашаж нерген вуйлатыше тыгерак палемда:
– Посёлкышто да воктенысе яллаште илыше 4200 наре еҥым обслуживатлена. Кызыт кермыч оралтын ик пачашыштыже пашам ыштена. А тений «Продолжительная и активная жизнь» нацпроект почеш амбулаторийлан блочно-модульный конструкцийым келыштарышаш улыт. Тыге медперсоналлан пашам ышташ условий саемшаш, черлыеҥ-шамычланат йӧнанрак лиеш.
«Продолжительная и активная жизнь» нацпроектын «Модернизация первичного звена» программыж почеш, Руэм посёлкысо амбулаторий деч посна тений тыгак Звенигово район Какшамарийыште, Волжский округ Отымбалыште тыгаяк блочно-модульный конструкцийым нӧлтышаш улыт.