Краснодар кундем Красная Поляна посёлкышто «Краса Руси 2026» Всероссийский моторлык конкурсын финалже лийын. Тушто Марий кугыжаныш университетысе медицине институтын студенткыже Анастасия Олимпиева «Девушка года Мисс Краса Руси – 2026» номинацийыште сеҥышыш лектын.
Изинек – медициныште
Анастасия Озаҥ олаште шочын-кушкын. Ты оласе 145-ше номеран физико-математический лицейым тунем пытарен. Кызыт Марий Кугыжаныш университетыште нылымше курсышто «Педиатрий» направлений почеш профессионал шинчымашым налеш.
– Изиэм годым музык дене заниматленам. Музыкальный школын флейте да вокал класслаштыже шинчымашем нӧлтенам. Кугурак лиймеке, диургымаш йыжыҥлам шымлаш тӱҥалынам. Технологий предмет дене школьник-влаклан эртаралтше Всероссийский олимпиадын регионысо йыжыҥыштыже кум гана чемпион лийынам.
Ончыкылык профессием медицине дене кылдаш шонен, Марий кундемыш тунемаш толынам. Авам Озаҥ оласе ик эмлымверыште медшӱжарлан пашам ышта. Изиэм годым тудо мыйым чӱчкыдын пеленже пашашкыже кондыштарен. Мӧҥгыштӧ нигӧ дене кодаш лийын, садлан пырля налын. Тушто вамлан тӱрлӧ сомылым «тӧрлаш» полшенам. Тыге тудын шуктымо пашажлан шӱмаҥ кушкынам да ончыкыжым мыят медик лиям манын, пеҥгыдын шонен пыштенам.
Кызытеш могай врач лияш эше палемден омыл. Кажне у йыжыҥ шке семынже сымыстара. Но неонатологий, акушерстве але гинекологий направлений деке чон утларак шупшеш, – каласкала Анастасия.
Чолга студент
Тунемме деч посна ӱдыр вузын илышыштыжат чолгалыкшым ончыкта. Студент-влаклан кажне ийын эртаралтше «Студент шошо» фестивальыште мастарлыкше дене куандара. Тыгак 2018 ий годсек Анастасия Озаҥ оласе ик модельный агентствын тӱҥ составшын модельжылан шотлалтеш. Ты агентствын директоржо ӱдырлан «Краса Руси – 2026» конкурсыш ушнаш темлен.
– Конкурслан лӱмын ойырымашым эртенна. Тушко пеҥгыдемдымеке, кыртмен ямдылалташ пижынна. Мыланна национальный костюмым, тыгак съёмкылан икмыняр образым чоҥаш кӱлын.
Мероприятий Красная Поляна посёлкышто лийын. Ты жапыште тушто шокшо да мотор кече шоген. Конкурсыш элнан тӱрлӧ регионжо гыч участнице-шамыч толыныт. Нунын дене эреак веселитленна, мурым муренна, икте-весылан нарядым ямдылаш полшенна, тӱрлӧ сӧрастарыш дене вашла пайлалтынна. Конкурсантке-влак дене лишыл еҥ гаяк чучынна, садлан коклаштына нимогай таҥасымаш шижалтын огыл. Шагал конкурсышто икте-весе коклаште вычыл-вычыл койышым шижат. Сӧрал тувыр дене финалыш лекме деч ончыч вес номинацийыште участвоватлыше ӱдыр мыланем сылне сӧрастарышым пӧлеклен, чоныштем тунам тунар сайын чучын. Кызытат ты татым порым шарналтем, – ойла мотор ӱдыр.
Анастасиян моторлык конкурсышто шкем тергыме опыт тылеч ончычат лийын. Тудо «Татарстанын моторлыкшо 2024» конкурсын финалисткыже. Кызыт ӱдыр ты мероприятийын жюриштыже. Садлан ты аланым сайынак пала. Яра жапым мотор ӱдыр пайдалын эртараш тырша: шуко лудеш але спорт дене заниматла. Ончыкыжым тудо Россий кӱкшытан моторлык конкурсышто веле огыл, эшеат кугуракыште участвоватлаш шона. Анастасия, ончыко гына!
Анастасия Олимпиева моторлык конкурсышто шкежат моло-влакым акла.
А.Олимпиеван альбомжо гыч налме фото.