Республикысе Марий тӱвыра рӱдерын «Сото вий» калык мурым мурышо ансамбльже Ульяновскышто эртаралтше «Поволжская глубинка» XII Россий кӱкшытан калык тӱвыра фестивальыште лийын.
Тушто нуно марий калык муро-куштымаш, семӱзгар дене палдареныт. Фестивальым пайремлын почмаште участвоватленыт, Октябрьский посёлкышто мастарлыкыштым ончыктеныт. «Сото вий» ансамбльым Марий Эл тӱвыран сулло пашаеҥже Эльвира Петрова вуйлата. Ансамбль фестивальын дипломжо дене палемдалтын.