Тидын нерген Российысе ялозанлык рӱдерын Марий Элысе филиалыштыже умылтарат.
Кок чын лышташ деч ончыч огыл
Ятыр сад-пакчазе росотам, нӧшмӧ шытен лекмеке, вигак ӱяҥдаш тӱҥалеш (тыге вож когарга) але росотам пакчаш луктын шындыме марте йӧршеш ӱяҥдышым пуаш кӱлмӧ нерген монда (тыге росота чот шуйна да лунчырий лиеш).
Икымше гана ӱяҥдышым кок чын лышташ лекмеке веле пуыман. Нине лышташ-влак кушкылын, мутлан, помидорын, пурысын, тичмаш лышташыштымак ушештарат. Тудо, ӱдымеке, 10-14 кече гыч лиеш.
НО. Начар мландым кучылтында да нӧшмысӧ лышташнер жап деч ончыч нарынчалген гын, икымше гана икымше лышташ лекмекак ӱяҥдыман, но ӱяҥдышым пелыжым гына кучылтман.
Ӱяҥдышым шавыме жап
ТОМАТЛАН
- 1-ше гана: кусарен шындымеке, 10-12 кече гыч але кок-кум чын лышташ лекмеке,
- 2-шо гана: икымше гана ӱяҥдыме деч вара 10-14 кече гыч,
- 3-шо гана: пакчаш луктын шындыме деч вич-шым кече ончыч (иммунитетше пеҥгыдемеш).
Томат росоталан калий келша, тыге вурго кӱжгемеш, да росота ок шуйно.
ПУРЫС ДЕН БАКЛАЖАНЛАН
- 1-ше гана: кок чын лышташ лекмеке (но шекланыман – вож пеш ныжылге, эмганен кертеш),
- 2-шо гана: 12-15 кече гыч,
- 3-шо гана: пакчаш луктын шындыме деч арня ончыч.
Пурыс ден баклажан уто азотым огыт йӧрате – росота чот кушкеш, но пеледышлык ок лий. Томат дене таҥастарымаште азотым 20 процентлан шагалемдыман.
КОВЫШТАЛАН
- 1-ше гана: икымше чын лышташ лекмеке (моло кушкыл дене таҥастарымаште ончычрак),
- 2-шо гана: 7-10 кече гыч,
- 3-шо гана: пакчаш луктын шындыме деч кум-ныл кече ончыч (обязательно фосфоран ӱяҥдыш лийшаш, тыге ковыштавуй сайынрак чумырга).
Ковышта ӱяҥдышым пеш йӧрата. Жапыштыже ӱяҥдаш огыл гын, росота начар лиеш, ковыштавуй удан погына.
КИЯР ДЕН КАБАЧОКЛАН
- 1-ше гана: кусарен шындымеке веле (вич-шым кече гыч), кок-кум лышташ лиймеке,
- 2-шо гана: пакчаш але теплицыш луктын шындыме деч кум кече ончыч.
Кияр ден кабачокым моло кушкыл дене таҥастарымаште шуэнрак ӱяҥдыман – ӱмбал вожышт ӱяҥдышын шинчалже дене вашке эмганен кертеш. Садлан ӱяҥдышым пуымо деч ик шагат ончыч мландыш ондак яндар вӱдым шавыман. Ӱяҥдышым вожыш пышташ тыршыман, лышташыш логалтыман огыл. Логалеш гын, пульверизатор гыч вӱд дене мушкын колтыман.
ПЕТУНИЙЛАН ДА МОЛО ПЕЛЕДЫШЛАН
- 1-ше гана: кок-кум мужыр чын лышташ лекмеке,
- 2-шо гана да вара: пакчаш луктын шындыме марте кажне 7-10 кече еда.
Пеледыш росоталан утларак фосфоран ӱяҥдыш кӱлеш, тудым чӱчкыдынрак шавыман – тыге пеледышлык шуко лиеш. А азот шуко логалеш гын, ужаргыже гына чот кушкеш, начарын пеледеш.