Российысе Тӱвыра министерстве «Красный Яр. Стоянка III» шогымо верым тӱвыра поянлык-влак объектын единый кугыжаныш реестрышкыже пуртен. Ынде Марий кундемысе ты археологический памятник федеральный кӱкшытыштӧ аралалтеш.
Памятник Звенигово район Чакмарий селаште верланен. Тысе Чара Пӱнчӧ урем 20-шо пӧрт деч йӱдвел-эрвел могырыш 600 метр лиеш. Тудо мемнан эра деч VII тӱжем ий ончычсо саман гыч. Документыште тыгак объектын йырым-йырысе чекшым пеҥгыдемдыме.