18-19 августышто Йошкар-Оласе «Дружба» стадионышто регби дене (2012-2013, 2014-2015, 2016-2017 ийлаште шочшо-влак коклаште) Медведево районысо администраций вуйлатышын кубокшо верч таҥасымаш лийын. Тушко Татарстан, Чуваший, Марий Эл республикла, Угарман кундем, Моско да Самара областьла гыч команде-влак ушненыт.
Кум тӱшкаштыжат – сеҥымаш
Медведево районысо спортшколын «Медведи» командыже кум тӱрлӧ ийготыштыжат сеҥыше да призёр: 2012-2013 ийлаште шочшо-влак – кокымшо, 2014-2015 – икымше, 2016-2017 – икымше.
Григорий Козлов – 2014-2015 ийлаште шочшо регбист-влак радамыште. Рвезе Медведево районысо регби дене спортшколын «Медведи» командыштыже мастарлыкшым тапта. Ты спорт дене шым ийым темымекыже заниматлаш тӱҥалын.
– Мый Алексей Николаевич Ульянкин дене шуаралтам. Тренировко-влак Медведево посёлкысо «Олимп» стадионышто эртаралтыт. Кеҥежым кечылан кок гана тренироватлалтына, тунемме годым арняште куд кече стадионышто улына. Мыланем регби моткоч келша. Тудо койыш-шоктышым пеҥгыдемдаш, командыште модаш, дисциплиным шукташ сайынак полша. Тыгак ты спортлан кӧра шуко йолташым муынам. Рвезе-шамыч дене икоян улына, вашла келшена, – ойла регбист.
Сайын тунемеш, спортым йӧрата
Григорий Медведево посёлкысо 1-ше номеран гимназийыште шинчымашыжым нӧлта, 6-шо классыш вончен. Тудын шуко жапшым спорт айла гынат, школышто «4»-ан ден «5»-ан веле тунемеш. Рвезе командыж дене кажне тылзын манме гаяк тӱрлӧ кӱкшытан таҥасымашлашке лектын коштеш. Тудын ийготшылан келшыше командыште 15 наре спортсмен шуаралтеш. Нуно тыгак чӱчкыдын сборышто улыт. Регбист-шамычлан кундемыштына «Яльчик Арене» спорт кумдыкышто кажне ийын сбор эртаралтеш. Тушто нунылан тренироватлалташ чыла шотыштат йӧным келыштарыме.
Кеч-могай спортышто тӱҥжӧ – пашаче кумыл, палемда Григорий. Тидыжак тудым кажне кечын тренировкыш кошташ, шуаралташ да сай лектышым ончыкташ виктарен шога.