Ты арнян Марий Элысе школлаште Пытартыш йыҥгыр йоҥгалтын. Марий Элым Вуйлатыше Юрий Зайцев Национальный сымыктыш гимназийысе выпускник-влакым саламлаш миен.
9-ше классыште тунемше-влаклан Марий Элым Вуйлатыше у корныш ужатыме шомакым ойлен, шке усталык корныштым регионыштак шуяш да республикнам уло эллан чапландараш тыланен.
Тудо ушештарен: пытартыш жапыште кундемысе сымыктыш школ-влаклан у инструментым, оборудованийым да литературым налме. Тыгак еҥ-влакын йодмышт почеш Медведево посёлкышто у сымыктыш школым чоҥаш тӱҥалме.
Тений гимназий 65 ияш лӱмгечыжым палемда. Тиде ойыртемалтше тунемме тӧнеж Марий кундемыште тӱвыра да сымыктыш сферыште шуко кӱкшытан образовательный кластерлан шотлалтеш. Кызыт гимназийыште музыкальный, художественный да хореографический направленийла дене 400 наре йоча тунемеш. Тыште Всемарийский хорым, симфонический оркестрым, калык семӱзгар оркестрым, духовой оркестрым да кӱслезе-влакын ансамбльыштым чумырымо.
Юрий Зайцев гимназийын директоржо Светлана Зверевалан тӧнежысе тоштерым уэмдаш 200 тӱжем теҥгеаш сертификатым кучыктен.
Тысе 14 выпускник гыч латкумытынжо шке специальностьышт дене И.С.Палантай лӱмеш тӱвыра да сымыктыш колледжын академический музык факультетыштыже умбакыже тунемаш шонат. Нуно тӱнямбал, Российысе, республикысе конкурсласе лауреат, почеламутым лудмо да тӱрлӧ предмет дене олимпиадыште сеҥыше улыт. Тыгак Москошто Йоча тӱвыра форумышто, Кремльысе ёлкышто, ВДНХ-ште «Россия» тӱнямбал выставке-форумышто участвоватленыт.
Тений Пытартыш йыҥгыр республикысе школлаште тунемше, 11-ше классым пытарыше 2700 да 9-ше классым пытарыше 8100 утла выпускниклан йоҥгалтын.