2021 ий 1 сентябрь гыч Российыште «Пушкинская карта» программе илышыш шыҥдаралтеш. Ты карте банкысе карте гаяк, тушко кугыжаныш кажне ийын оксам (тений ты окса кугыт – 5 тӱжем теҥге) колта, туддене 14-22 ияш самырык еҥ-влак тоштерлаш, театрлаш, ончерлаш, концертлаш да моло тӱвыра мероприятийлаш коштын кертыт.
«Пушкин карте» программе дене Марий Элыште 78 тӱвыра тӧнеж: 24 тӱвыра пӧрт, 20 тоштер, 19 книгагудо, 10 кинотеатр, 6 театр, туныктымо тӧнеж да концерт площадке – пашам ышта.
2026 ий 24 августлан данный почеш, республикыштына «Пушкин картым» 42 091 еҥ оформитлен.
Тений январь-июльышто Марий Элыште ты программе почеш 17,4 млн теҥгелан 38 458 билетым ужалыме, тышеч 70%-ше – кинотеатрыш.
С.Г.Чавайн лӱмеш национальный книгагудышкат ятыр ӱдыр-рвезе Пушкин карте дене билетым налын мия. 2026 ийын пелштыже, мутлан, тыгай карте дене 504 билетым ужаленыт. Книгагудышто тидын шотышто теве мом палдарат:
– Ӱдыр-рвезе-шамыч утларакшым «Радуга» залысе ончерлаш экскурсий дене толыт. Тушто Российысе да йот элысе живопись шедевр-влакын репродукцийышт дене палыме лийыт, «Планета Земля» да моло проектысе фотовыставкылам ончаш йӧратат. «Свитки, рукописи, книги» программат самырык-шамычлан пеш оҥай, тушто шуэн вашлиялтше да ойыртемалтше изданий ден коллекций-влак дене палыме лийыт веле огыл, тыгак калиграфий, буквам да экслибрисым возымо дене мастер-класслаш ушнат.
С.Г.Чавайнын литератур кабинетышкыже экскурсийышкат Пушкин карте дене чӱчкыдын толыт. Кабинетын композицийже кум ужаш гыч шога: сылнымут, биографий, ыштыш-кучыш арвер.
Тений гыч эртараш тӱҥалме книгагудо дене палдарыше экскурсият самырык-влакым сымыстара. Ӱдыр-рвезе-шамыч книгагудын историйже, ойыртемалтше книга-влак, тӱвыра поянлыкым арален кодымаште книгагудын рольжо нерген пален налыт. Толшо-влакым тыгак книгагудышто кызыт шуктымо паша, тӱвыра да просветительский проект-влак да моло дене палдарат.